Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,003 Autor: Pistoleta Gènere: Sirventes Número: IX

 

Ar agues eu mil marcs de fin argen

I	1	Ar agues eu mil marcs de fin argen
		Et atrestan de bon aur e de ros,
		Et agues pro civada e formen,
		Bos e vacas e fedas e moutos,
	5	E cascun jorn .c. liuras per despendre,
		E fort chastel en que·m pogues defendre,
		Tal que nuls hom no m’en pogues forsar,
		Et agues port d’aiga dousa e de mar.
II		Et eu agues atrestan de bon sen
	10	Et de mesura com ac Salamos,
		E no·m pogues far ni dir faillimen,
		E·m trobes hom leial totas sasos,
		Larc e meten, prometen ab atendre,
		Gent acesmat d’esmendar e de rendre,
	15	Et que de mi no·s poguesson blasmar
		E ma colpa cavallier ni joglar.
III		Et eu agues bella domna plazen,
		Coinda e gaia ab avinens faissos,
		E cascun jorn .c. cavallier valen
	20	Que·m seguisson on qu’eu anes ni fos
		Ben arnescat, si com eu sai entendre ;
		E trobes hom a comprar et a vendre,
		E grans avers no me pogues sobrar
		Ni res faillir qu’om saubes atriar.
IV	25	Car enueis es qui tot an vai queren
		Menutz percatz, paubres ni vergoinos,
		Perqu’ eu volgra estar suau e gen
		Dinz mon ostal et acuillir los pros
		Et albergar cui que volgues deissendre,
	30	E volgra lor donar senes car vendre.
		Aissi fera eu, si pogues, mon afar,
		E car non pois no m’en deu hom blasmar.
V		Domna, mon cor e mon castel vos ren
		E tot quant ai, car etz bella e pros ;
	35	E s’agues mais de que·us fezes presen,
		De tot lo mon o fera, si mieus fos.
		Qu’en totas cortz pois gabar ses contendre
		Qu’il genser etz en qu’eu pogues entendre.
		Aissi·us fes Dieus avinent e ses par
	40	Que res no·us faill que·us deia ben estar.