Del Monte, Alberto. Peire d'Alvernha, Liriche. Torino: Loescher-Chiantore, 1955.

Codi: 323,019 Autor: Peire d'Alvernha Gènere: Vers Número: V

 

Lo fuelhs e·l flors e·l frugz madurs

I	1	Lo fuelhs e·l flors e·l frugz madurs,
		quan es sazos,
		m’es ioys e gaugz m’adutz,
		e·l retins per plas e per murs
	5	dels auzelhos
		e·l ros qu’el ram relutz,
		qu’entendemens
		mi ven e voluntatz
		d’esser sabens
	10	de mais en mielhs assatz.
II		Quar ses gaug grans sabers ni purs
		ni gienhs ginhos
		non er aut elegutz;
		per que ie·m ere en cent augurs
	15	iauzens ioyos
		e iauzens mantengutz.
		contra tals gens
		cuy falh sciens’ e patz:
		envj encens
	20	sobre·ls enamoratz.
III		Qu’ab lo plus gent ioy vau segurs
		qu’anc entre nos
		sai fos aparegutz,
		e no mi tenran dan digz durs
	25	d’omes iros
		ni lauzengiers lengutz;
		que·l senatz sens
		no·s camja ni·lh beutatz
		don sui iauzens,
	30	de bon’amor amatz.
IV		E sembla·m ben els ditz escurs
		et en razos
		de dir ses motz romputz;
		de que cove que mot mellurs
	35	tu, cuy det sos
		e motz far mentaugutz;
		que·l mai manens
		d’autruy part pert viatz
		bos covinens,
	40	pus no·y ren dels dos gratz.
V		Mas de mi non auja rancurs,
		que cobeytos
		suy sobre·ls autres drutz
		d’esquivar contra fals tafurs
	45	e d’amoros
		esser e ben volgutz;
		quar si trop tens
		mi fes fals’amistatz
		ia·m sent tenens,
	50	de fina afinatz.
VI		E quals qu’an contr’amar periurs,
		ieu serai bos
		ves l’amor que·m condutz,
		e francs e ferms en mos aturs,
	55	e·lh sospeyssos
		er en los sieus aiutz;
		don sapiens
		suy e mai melhuratz
		d’autres sinc cens
	60	d’amor enamoratz.
VII		Que cum l’aurs resplan e l’azurs
		contra·l fer ros
		desobre los escutz
		mi det do, tro lai ont es Surs,
	65	qu’ieu sobriers fos
		als grans et als menutz
		dels esciens
		de trobar ses fenhs fatz,
		don sui grazens
	70	ad aquilh don m’es datz.