Levy, Emil. Der Troubadour Bertolome Zorzi. Halle: Max Niemeyer, 1883.

Codi: 074,017 Autor: Bertolome Zorzi Gènere: Canso Número: IV

 

Si tot m'estauc en cadena

I	1	Si tot m’estauc en cadena,
		Er quan neis l’auzels demena
		Joi el plais
		Fazen vers, voutas e lais
	5	Pel temps qu’esclaira e serena,
		Pois leujat m’a de greu pena
		Us motz gais
		Qu’escriut m’a mos Noms Verais,
		Bels tanh que d’un chant l’estrena
	10	Que sia faitz d’aital mena
		Que mos jais
		Cobre en lieis qu’iram refrena.
II		Qu’ieu non ai autre messatge
		Que sapcha nostre lenguatge,
	15	Ni l’afar
		De quem volri’ aquitar,
		Ni cum tolc m’ira alegratge,
		Pois non vi son doutz visatge
		El cors car ;
	20	Pero sil poiria retrar
		C’om pren soven gran dampnatge
		Per deschausit companhatge,
		Mais camjar
		Fals dich non degran coratge.
III	25	Car trop par grans desmesura,
		Quand hom non met a non-cura
		Tal mentir
		Que nois poiri’a dreich dir,
		Que mantas vetz paucs pejura
	30	Trop mais qu’assatz non melhura ;
		Don chausir
		Quecs deuria, al mieu albir,
		Qu’a tal non fezes frachura
		Que l’ames outra mesura,
	35	Car merir
		Bens deu e mals ab dreitura.
IV		Pero non aja entendenssa
		Cilh on renha conoissenssa
		Qu’il pogues
	40	Far nulha ren quem greves,
		Sol c’a lieis fezes valenssa,
		Qu’en mi fora tals sofrensa
		Per sos bes
		Qu’ieu sofrira totas res,
	45	Mas so m’a faich dir temenssa,
		Car ai vist far deschasensa
		Tal que mes
		Son amic e non-chalenssa.
V		Car hom deu aver desire
	50	D’aicel qu’es sos fins servire
		Trair enan,
		Cum quel veja benanan,
		E, sil ve en greu martire,
		De tota ren far e dire
	55	Que d’afan
		Lo puosca anar eslonhan,
		Nis tanh qu’en virel cossire
		Si noi ve primiers assire
		Tal engan
	60	Cui dreitz non puosca escondire.
VI		Mas ges negus non entenda
		Qu’il soane ni contenda
		Nulha re
		Que tenga mesura ab se,
	65	C’om non la ve, que comprenda
		Son gen dire e sa fazenda,
		Que desse
		Noi trob abric de tot be,
		Car non es cauz’on s’estenda
	70	Abellirs que non deissenda
		Ois mante
		Sa fina beutatz ses menda.
VII		Sirventes, vai dreita via
		Dir lieis que ditz quem veiria
	75	Volontier,
		Benananssa et alegrier,
		Que leu donar m’en poiria,
		E segon dich o faria ;
		Tal sentier
	80	A pres d’amor, al premier
		Qu’il m’ac mes en sa bailia,
		Que nulh temps, cum qu’ieu me sia,
		Eu non quier
		Partir de sa senhoria.
VIII	85	Na Flors Vermelha, eu seria
		Pro alegres, cum qu’ieu sia,
		S’alegrier
		Vostra guerra nom tolia.
IX	90	Noms Verais, lieis graziria
		E vos del mot, si’n sabia
		Grat entier
		Rendre aissi cum s’escairia.