Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Bibliografia
* Testimonis
* Aparat crític
* Notes
* Imatges

 

Levy, Emil. Der Troubadour Bertolome Zorzi. Halle: Max Niemeyer, 1883.

Codi: 074,018 Autor: Bertolome Zorzi Gènere: Canso Número: VII

 

Totz hom qu'enten en valor

I
1
Totz hom qu’enten en valor
   
Deu esser amesuratz,
   
Si vol conquerer lauzor,
   
Qu’estiers non er gen lauzatz
 
5
        Ni de pretz garnitz,
   
Qu’aicel qui plus n’es aisitz
   
En seria voigz e blos,
   
        Si aitals non fos,
   
Quar petita desmesura
 
10
Merm’ e tol leugeramen
   
So qu’auran conquist greumen
    Valors e senz e mesura.
     
II
 
Per qu’om fai trop gran follor,
   
S’en re s’es desmezuratz
 
15
Per afan ni per legor,
   
Quar quecs deu sofrir en patz,
   
        On plus es marritz,
   
Qu’aissi n’er pels pros grazitz
   
E blasmatz, s’es orgolhos,
 
20
        On plus es jojos.
   
Pero a luec en melhura
   
Qui pas’ a mezuramen,
   
Qu’a la vez razos consen
    So que contraditz natura.
     
III
25
Mas us tals usatges cor
   
Que paucs n’a d’adreituratz,
   
Ans si prezon li pluzor
   
Per far faigz outracuidatz,
   
        Don es pretz delitz
 
30
E jois e dompneis peritz
   
Per us truans enojos,
   
        Qu’om galhartz ni pros
   
Ni domna valenz ni pura
   
Non trueb’ ab els garimen,
 
35
Si viure vol gajamen,
    Tant es avols lur natura.
     
IV
 
Quar il amon tan eror
   
E tant lur plai malvestatz
   
Qu’il si fan devinador
 
40
Per destruir joi e solatz,
   
        E levon fals critz
   
Entr’ amanz et amairitz,
   
Don li marit son gelos
   
        Elh dreg amoros
 
45
Grevat senes forfaitura
   
E las domnas eissamen,
   
Per qu’entr’ amor e joven
    Deportz s’es mes a non-cura.
     
V
 
E car jovenz laiss’ amor
 
50
Et il lui devas totz latz,
   
Ira de mal en pejor
   
Lo segles, de quem desplatz,
   
        Quar jovenz es guitz
   
Et amors cim’ e rassitz
 
55
De mainz affars cabalos,
   
        Don nais messios,
   
Qu’atrai joi e pretz atura.
   
Per qu’ai de chantar talen
   
Sol per lur mantenemen,
 
60
Er on plus s’espan freidura.
     
VI
 
Si tot ai ir’ e dolor,
   
Quar per mainz enamoratz,
   
Quis fenhon fin amador,
   
Es lurs mentirs autrejatz,
 
65
        Qu’om es plus falhitz,
   
S’un fals dig no contraditz,
   
Des quelh pejura resos,
   
        Qu’aicel qu’en ditz dos
   
Tals quel resos nolh pejura ;
 
70
Pero amdui ses conten
   
Meiron dol e marrimen
    Per foudat e per falsura.
     
VII
 
Valhenz dompna, cui azor,
   
Tant es vostre senz triatz
 
75
E vostre pretz rics d’onor
   
E fina vostra beutatz
   
        Queis for’ escarnitz
   
Chascus qui fos tant arditz
   
Que sol penzes contra vos
 
80
        Ni que fos mest nos
   
Enjanz ni clams ni rancura
   
De negun galiamen,
   
E car ho sap veramen,
    Mos cors de joi m’asegura.
     
VIII
85
        Lai on es fals critz
   
Per mains faitz et aculhitz
   
T’en vai de ma part, chanzos,
   
        Per conort dels pros,
   
A la plus douza figura,
 
90
Quar faza de ti prezen
   
A leis don chant a prezen
    Sol per esfortz de verdura.
     
IX
 
        Hai, sainz esperitz,
   
Tot home qu’acuelh ni ditz
 
95
Fals dig ni ver enojos
   
        Faiz tan dolores,
   
Com tanh a sa forfaitura,
   
Qu’aisi ral monz d’avinen,
   
E cil qu’amon lejalmen
 
100
Auran gran bon’aventura.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI