Levy, Emil. Der Troubadour Bertolome Zorzi. Halle: Max Niemeyer, 1883.

Codi: 074,008 Autor: Bertolome Zorzi Gènere: Sirventes Número: XII

 

Mal aja cel que m'apres de trobar

I	1	Mal aja cel que m’apres de trobar,
		Car de trobar alegrier no m’apres,
		Qu’eu sai trobar chanzos e sirventes,
		E no truep re que jam puesc’ alegrar,
	5	Anz mi torna tot quant trueb en dolor.
		Per que trobars en re no m’a sabor,
		Quar ges nulz hom non troba ben ni gen
		Si non troba so qu’a lui es plazen.
II		Mas car trobars alegrier nom pot dar,
	10	Pauc prezeira si trobar non saupes ;
		Quar de mil us tant ensenhatz noi es
		Qu’un prim chant gent sapch’ entendre ni far,
		Ja ques fenhon maint adreg trobador.
		Mas qui saupes quant sabon li pluzor,
	15	Ben pogra dir : Ieu conois veramen
		Qu’entrels non ha gran ren d’ensenhamen.
III		Per qu’eram tenc az enueg mon chantar,
		Com qu’autre temps a plazer lom tengues,
		Quar es tengutz chantars a nesies,
	20	Ni eu meteis a sen nol puosc jutjar,
		Quar per chantar non conquer hom lauzor,
		Quar s’us chanz es escurs de gran valor
		A greu es hom qui n’aj’ entendimen,
		E si’l es clars que jal prezi granmen.
IV	25	E par a so quem dison dui joglar
		Dels plus adregz qu’aj’en aquest paes,
		Que chascuns d’els un chantar mi repres,
		Ja que noi fos motz en cui esmendar.
		Mas so non dic per mermar lur honor,
	30	Quar il m’amon et ieu lor port amor,
		Enanz ho dic, quar ajon chauzimen,
		Pois il falhon qu’a pauc sabon nien.
V		Pero ben sai que d’aquest razonar
		Pori’om dir que falhimen fezes,
	35	Qu’om deu esser francs, adregz e cortes,
		Si vol autrui reprendre ni blasmar ;
		Quar qui repren ni blasma tal follor
		Don pogr’ aver a dreg reprendedor,
		Melh nos pot far tener desconoissen
	40	Ni plus anar sa foudat descobren.
VI		Mas non cuges nuls hom de tal afar
		Qu’eu jam fenhes en totz faitz ben apres,
		Qu’eu sai qu’en mi tal saber non a ges
		Que tan plazen mi pogues ensenhar.
	45	Pero de mi non dic lau ni blasmor,
		Quar tuit maistre son chauzit al labor,
		Mas a mos chanz pod hom chauzir leumen
		Quant valh en l’art de trobar primamen.
VII		Mon novel chant envei a Mon Plus Car
	50	Per far restaur a so qu’eu l’ai promes,
		Qu’estiers non sai com mielh li restaures,
		Que sil saupes, non m’auri’a tarzar ;
		Quar sos enuegz m’atrai ir’ e dolor
		E sos plazers alegranz’ e douzor,
	55	Per qu’eu li prec que viv’ alegramen,
		Si jam vol far alegre ni jauzen.
VIII		Prometres tanh a bon entendedor
		Et atendres a bon prometedor,
		Per qu’eu promis so que de cors aten,
	60	Quar qui promet deu atendre breumen.
IX		Na Bels Salutz, de vostr’ ensenhamen
		Ai tot quant sai far ni dir ben ni gen.