Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 356,007 Autor: Peire Rogier Gènere: Vers (avec réponse) Número: 8

 

Senh'en Raymbaut, per uezer

I	1	Senh’en Raymbaut, per uezer
		de uos lo conort e·l solatz
		suy sai uengutz tost e uiatz,
		mais que no suy per uostr’auer ;
	5	que sapcha dir, quan m’en partray,
		cum es de uos ni cum uos uay,
		qu’enqueron m’en lai entre nos.
II		Tant ai de sen e de saber
		e tan suy sauis e membratz,
	10	quant aurai uostres faigz guardatz,
		qu’al partir en sabrai lo uer,
		s’es tals lo guaps quon hom retray,
		si n’i a tant o meinhs o may,
		cum aug dir ni comtar de uos.
III	15	Gardatz que uos sapchatz tener
		en aisso qu’ara comensatz,
		quar hom, on plus aut es poiatz,
		plus bas ue, si·s laissa chazer ;
		pueys dizon tug que mal l’estay :
	20	„per que fetz, pueys era no fay ?“
		qu’era no ten condugz ni dos.
IV		Qu’ab pro maniar et ab iazer
		pot hom estar suau maluatz,
		mas de gran afan es carguatz
	25	selh que bon pretz uol mantener ;
		obs l’es que·s percas sai e lai
		e tolha e do, si cum s’eschai,
		quan ueira qu’er luecx e sazos.
V		No·us fassatz de sen trop temer,
	30	per qu’om digua : „trop es senatz“,
		qu’en tal luec uos ualra foudatz
		on sens no·us poyria ualer ;
		tant quant aurez pel saur e bai
		e·l cors aissi fresquet e gai,
	35	grans sens no·us er honors ni pros.
VI		Si uoletz al segle plazer,
		siatz en luec folhs ab los fatz,
		et aqui meteys uos sapchatz
		ab los sauis gen captener ;
	40	qu’aissi coue qu’om los assay :
		l’un ab ira, l’autre ab iay,
		ab mal los mals, ab ben los bos.
VII		D’aisso uuelh que·m digatz lo uer,
		s’auretz nom drutz o molheratz,
	45	o per qual seretz apellatz,
		o si·ls uolrez ams retener ;
		ueiaire m’es al sen qu’ieu ai,
		segon qu’ieu cug, mas non o sai,
		qu’a dreg los auretz ambedos.
VIII	50	Senh’en Raymbaut, ie·m n’iray,
		mas uostre respost auzirai,
		si·us platz, anz que·m parta de uos.