Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,039 Autor: Giraut de Bornelh Gènere: Canso Número: XLIII

 

Ja·m vai revenen

I	1	Ja·m vai revenen
		D’un dol e d’un’ira
		Mo cor; qu’er’aten
		Per sol bo conven
	5	Benanans’e jai,
		Per qu’eu chantarai.
		C’ogan no·n pensera,
		Pos vergers ni pratz
		No m’adui solatz
	10	Ni chans pels plaissatz
		Que l’auzelet fan
		Vas lo torn de l’an.
II		Ni ja l’avol gen
		Paiatz no sofrira;
	15	C’apensadamen
		Van vas valor len,
		Per que pretz dechai.
		Ren als no·us en sai,
		Mas ja no cudera
	20	Fos aissi viatz
		Jois dezamparatz!
		Vos m’en conortatz,
		Domna, per cui chan
		E·m vauc alegran.
III	25	E per vos defen
		So que plus me tira
		Que no m’es parven
		Pel bo pensamen
		Que n’agui e n’ai,
	30	Pos plus no m’eschai.
		C’assatz melhs chantera,
		Si·l gens cors onratz
		Me fos plus privatz,
		E pero, si·us platz,
	35	No·i dei aver dan,
		Si·us me prec chantan.
IV		C’ab plus d’ardimen
		Mo fat cor no·s vira,
		Tan no m’espaven!
	40	Ans me ditz soven
		C’a mo dan serai,
		Can vos preiarai,
		Pos aissi m’etz fera,
		Car sol cudatz,
	45	Ans que re·n sapchatz.
		Si plus n’auziatz,
		Paor me fai gran
		Que·m dobles l’afan.
V		Mas mon escien
	50	Tot’altra·m sofrira
		Plus d’envazimen.
		Parlem belamen;
		Diatz o dirai:
		Cal tort vos aurai,
	55	Si·us am o enquera
		Vos me prec forsatz,
		Pos pres e liatz
		Sui? Ja no crezatz
		Com sobre talan,
	60	Ja m’ane garan!
VI		Car qui·l drech enten
		D’amor ni·n sospira,
		No·i pot aver sen
		De gran jauzimen,
	65	S’ab foldat no·i vai;
		C’anc drut savi gai
		No vi, c’ans esmera
		Lo sen la foldatz
		Qu’era, s’amavatz
	70	E·l sen creziatz,
		Per pauc de semblan
		Iriatz doptan!
VII		E per aisso pren
		Qui trop no s’albira .
	75	Primers, car consen
		So c’altre repren.
		Ges be no m’estai,
		Si·us me prec, de lai;
		Eissamen m’amera
	80	Com vos vos amatz
		Que guerra·m fassatz?
		Mas sofretz en patz;
		Que cilh venceran
		Que melhs sofriran.
VIII	85	Qu’en patz e sofren
		Vi ja que·m jauzira
		D’un’amor valen,
		Si leugeramen
		Per fol sen savai
	90	No·m fezes esglai
		So que m’aiudera,
		S’eu fos veziatz;
		Mas fezi·m iratz
		Per c’altre senatz,
	95	Can m’anei tarzan,
		Pois e pres enan.
IX		E pois? Sofert era
		Maior tort assatz,
		Can m’en sui lonhatz,
	100	E sui n’esfredatz!
		Per que·us prec e·us man
		Que sofratz aman.
X		Be·m platz que l’aman
		Amon sofertan.
XI	105	Car cilh venceran
		Que be sofriran.