Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,036 Autor: Giraut de Bornelh Gènere: Canso Número: XLV

 

Ges aissi del tot no·m lais

I	1	Ges aissi del tot no·m lais
		Chantar ni deport ni rire,
		Can qu’era do lai m’eslais;
		Mas car plus no platz
	5	Conortz ni solatz,
		No volh en me sol despendre
		Mos bos dichs prezatz,
		Ans desque comens
		Mos chans avinens,
	10	Pois n’estrenh las dens,
		Que no·ls aus retraire;
		Car non i vei gaire
		Cui plassa jais
		Ni trop qui m’envei,
	15	S’eu m’alegre ni m’esbaudei.
II		E pero si me notz mais —
		Mas que no m’es bel a dire —
		Ma mal’amia que·m trais
		E si·m par foldatz
	20	Car m’en sui proatz,
		Pos a leis no·m posc defendre.
		Mal me sui menatz,
		Serai donc sofrens,
		Ja m’en venha lens
	25	Bes e jauzimens;
		C’anc negus amaire
		No saup d’amor gaire
		Que leu s’irais,
		C’Amors dona lei
	30	Com l’altrui tort bland’e mercei.
III		Vers es que s’amor m’estrais
		E non pot escondire;
		Mas pos la forsa·l prat pais,
		Que m’i val vertatz ?
	35	Melhs me for’assatz
		Que·l cor vires en atendre
		Vas calacom latz;
		Que pos forsa vens,
		Non es drechs valens,
	40	E·l paucs esciens,
		Que m’es chabdelaire,
		Dona m’un veiaire
		Qu’eu cre m’abais,
		Can vas leis felnei;
	45	C’a poder que·m sorz’o·m sordei.
IV		Mas qui·m fos amics verais
		E de mos bes esjauzire,
		Fis e francs e ses mals ais,
		Ab que·m fos celatz,
	50	Que no fos preiatz,
		Joi m’i pogr’enquera rendre.
		No·n sui tan lonhatz?
		Que·l cor mescrezens
		Se combat e·l sens
	55	E·l tertz espavens;
		C’anc nuls temens laire
		Negu fort repaire
		Sols non enfrais,
		Que·l cor e tuch trei
	60	Plus temen no·lh movan desrei.
V		Era sojorn et engrais,
		Car sap com me pot aucire!
		C’anc pois no fui letz ni gais,
		Desc’us fols versatz
	65	Que m’aduis pechatz
		M’afiet e·m fetz entendre
		Gran mensonh’e·l fatz
		No·m fo pois guirens
		Plus que·l pensamens,
	70	En que m’as, o vens.
		E ja domneiaire,
		S’er’us emperaire,
		So sobrer fais
		Non er qui·lh l’envei,
	75	C’Amors no vol c’om senhorei.
VI		C’anc no fo qui be s’afrais
		Ni·s fetz vencutz ni sofrire,
		Si tot fon en als savais,
		C’ans no fos paiatz
	80	C’us desmezuratz
		Que·s menassa d’escoissendre,
		Per c’umilitatz
		Val als conoissens.
		E donc no n’aprens
	85	C’orgolhs es niens
		E·l bos sofertaire,
		Si no n’es gabaire,
		Conquer qui bais
		E tenh’e manei?
	90	Mas eu no dic que be n’estei!
VII		Anc valors cui vils pretz frais
		Per vils agradils assire
		Vas benestar no s’atrais
		Ni ja rics malvatz
	95	Ni mal ensenhatz
		No si degr’en alt estendre!
		Si·n fos drechs jutjatz,
		En van! — O m’entens?
		Oc! — E donc consens,
	100	Que malvaza gens
		S’aus vas domn’atraire
		Conhda de bon aire,
		Que d’aize nais
		Locs en que folei?
	105	Mas cui no·n pes’, amor abnei!