Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,007 Autor: Joan Esteve Gènere: Pastorela Número: II

 

L'autrier, el gay temps de pascor

		PASTORELLA QUE FES JOHAN ESTEVE EN L’AN MCCLXXV.
I	1	L’autrier, el gay temps de pascor,
		quant auzi·ls auzelhetz chantar,
		per gaug que·m venc de la verdor,
		m’en yssi totz sols delechar,
	5	ez en un pradet, culhen flor,
		encontrey pastora ses par,
		cuend’e plazen,
		mot covinen,
		anhels seguen.
	10	La flor culhen
		dizia
		qu’anc dia
		de far amic non ac talen,
		quar via
	15	s’en cria
		don malvestatz pren nayssemen.
II		Saludiey la — quar a gensor
		no cre qu’om vis anhels gardar —
		ez elha mi, don ac pavor,
	20	quar no·m vi tro m’auzi parlar,
		e dis: «Senher, no m’a sabor
		quar etz aissi, faitz vostr’anar.
		Pecx etz de sen,
		non per joven,
	25	a Dieu mi ren!
		Qu’anatz queren?
		Parria
		qu’espia
		fossetz de qualque folha gen,
	30	o·us guia
		falsia
		del fals plazer qu’amors desmen».
III		«Greu pot hom jutjar per semblan,
		toza», fi·m yeu, «senes falhir,
	35	quar mant bo ten hom per truan
		e mant malvat vey mout grazir;
		per que·us prec que d’ayssi enan
		vulhatz, ans que parletz, auzir,
		que yeu non so
	40	sers d’ochaizo;
		mas, si·us sap bo,
		m’amor vos do».
		«Trobada
		pus fada
	45	vos agr’ops, senher, acsetz; no
		m’agrada,
		l’estrada
		seguetz, anatz, faitz vostre pro».
IV		«Toza», fi·m yeu, «ans que m’en an
	50	vos faray lo dous joc sentir
		qu’entre amigua ez aman
		se fai; mar ges no·us vuelh aunir,
		tan me platz vostra beutatz gran
		qu’estiers de vos no·m vuelh partir».
	55	«Qui·m mou tenso
		d’aital razo,
		no sap qui·m so,
		senher, ni co
		irada,
	60	trobada
		m’en fetz l’autrier un folh cusso.
		Mainada
		blasmada
		no vuelh e mi aja parsso».
V	65	«Toza cuenhta, qual que·m veiatz,
		be·us valrai yeu mais que pus belh,
		que d’aver suy ricx e bastatz,
		e far vos n’ai part, cors yrnelh.
		Per que·us prec que m’amor vulhatz
	70	e fassam lo dous joc novelh
		ins el jardi,
		lai sotz selh pi,
		que mais, ses fi,
		valretz per mi».
	75	«Ma pensa
		no·s gensa,
		senher, al vostre pro, quar si
		entensa
		ges tensa
	80	acsetz, tengratz vostre cami».
VI		«Na Toza, si vos sabiatz
		can gent vas amors mi capdelh
		cre que de las flors que portatz
		m’en fessetz leumen un capelh.
	85	Mantenen, menan gran solatz,
		intrem no·n sotz un arborelh».
		Don s’esjauzi,
		quar son pretz fi
		non l’esvazi;
	90	e dis aissi:
		«M’agensa
		que·m vensa,
		senher, vostr’amor ses tot si;
		plazens’, a
	95	parvensa,
		m’avetz». Ab aitan fezem fi.
VII		Suffrensa,
		valensa
		a·n Guillem de Lodev’ab si,
VIII	100	qu’ofensa
		no·s pensa
		mar al Belh Ray qu’am mais de mi.