Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,011 Autor: Joan Esteve Gènere: Retroencha Número: V

 

Si·m vay be ques yeu non envey

		RETROENCHA QUE FES JOHAN ESTEVE MCCLXXXI
I	1	Si·m vay be ques yeu non envey
		d’est mon autra benenansa;
		ricor de comte ni de rey
		no cre·m des tan d’alegransa
	5	quo fai la gensor,
		qu’es de beutatz flor,
		a tria;
		que yeu ai s’amor
		ez ylh a ss’onor,
	10	l’amia.
		Ben dey chantar gayamen
		pus ai tan gai jauzimen.
II		Quar am lieys enaissi quo mey,
		ez ylh me d’aital sembla[n]sa,
	15	ez em d’un cor e d’una ley,
		non es grans meravelhansa
		s’ieu ne fas lauzor,
		quar no·n sai mellor,
		ni·s lia
	20	el mon bellazor.
		E qu’ieu amador
		sieus sia.
		Ben dey chantar gayamen
		pus ay tan gay jauzimen.
III	25	La bella a cuy eu sopley
		me dobla la benenansa
		en que·m ten, quar sa beutat vey
		que non a par ni egansa,
		qu’ab sa resplandor
	30	tud’autra clardor,
		quo·l dia
		l’estela d’albor;
		per que m’a sabor
		qu’ieu dia:
	35	ben dey chantar gayamen
		pus ay tan gay jauzimen.
IV		Franqueza e bontat a ab sey
		la gaya res, ses duptansa.
		que platz li qu’ieu m’en esbaudey,
	40	quar sap qu’enantisc s’onransa;
		per ques m’avigor
		gays joys, qui que·n plor
		o·n ria.
		Doncx, pus chantador
	45	m’a fach ses clamor
		m’amia,
		ben dey chantar gayamen
		pus ai tan gay jauzimen.
V		Ieu chan gayamen quo far dey
	50	quar gaya dompna m’enansa
		ab gay cors a cuy platz dompnei
		quant honor no·y pren mermansa,
		Mai m’es que seror,
		quar ylh me secor
	55	de guia
		qu’ieu no·m sent dolor,
		mas joy ses error
		que·m guia.
		Ben dey chantar gayamen
	60	pus ay tan gay jauzimen.
VI		Guillem a valor
		de Lodev’e cortezia,
		e·l Belh Ray franquor;
		qu’ieu gays per s’amor
	65	estia.
		Ben dey chantar gayamen
		pus ay tan gay jau[zimen].