Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,045 Autor: Giraut de Bornelh Gènere: Canso Número: XLVIII

 

Leu chansonet' e vil

I	1	Leu chansonet’e vil
		M’auri’a obs a far
		Que pogues enviar
		En Alvernh’al Dalfi.
	5	Pero, s’el drech chami
		Pogues n’Eblon trobar,
		Be·lh poiria mandar
		Qu’eu dic qu’eu l’escurzir
		Non es l’afans,
	10	Mas en l’obr’esclarzir.
II		E qui de fort fozil
		No vol coltel tochar,
		Ja no·l cut afilar
		En un mol sembeli;
	15	Car ges aiga de vi
		No fetz Deus al manjar,
		Ans se volc esalzar
		E fetz esdevenir
		D’aiga qu’er’ans
	20	Pois vi per melhs grazir.
III		E qui dins so cortil,
		On om no·l pot forsar,
		Se vana d’aiudar,
		Pois no fai, mas qu’en ri,
	25	Pron a de que·s chasti,
		E qui de sol gabar
		Vol sos clameus paiar,
		Ja Deus re can dezir
		Noca l’enans
	30	Ni li lais avenir!
IV		Per qu’eu d’ome sotil
		Que sap so melhs triar
		No·m met a chastiar
		Ni fort no·m n’ataï;
	35	Mas un pauc me desvi,
		Car non o posc mudar
		Tan m’es greu a portar,
		Qui no sap eissernir
		Caus d’entre tans
	40	Ni cui com al partir.
V		E si·lh fach son gentil
		A la valor levar,
		Aissi·s fan a guidar
		C’om s’en sen, a la fi;
	45	Que lo savis me di
		Que ges al mech tensar
		No dei ome lauzar
		Per so ben escremir
		Ni per colps grans,
	50	Que·l pretz pen al fenir.
VI		E qui ja per un fil
		Pen pretz, c’om sol amar,
		Greu poira pois trobar,
		Si·s romp, qui ferm lo li;
	55	C’a pauc en un traï
		No son li ric avar,
		C’aissi, co·s degr’alzar
		Per els e revenir
		Pretz e bobans
	60	E jois, l’en fan fugir.
VII		Mas eu tri un de mil,
		Pero no l’aus nomnar
		Per paor d’encuzar
		Que·lh dreisses lo coissi;
	65	C’oi del ser al mati
		No pot re melhurar
		Ni ja apres sopar
		No l’auziretz re dir,
		Qu’eis lo mazans
	70	No n’esch’apres dormir.
VIII		Era·m torn en umil
		Vas mo Bel-Senhor char;
		Ren als no·lh sai comtar
		Mas que s’amors m’auci.
	75	Ai, plus mal assesi
		Noca·m saup envirar
		Qu’era no posc pauzar;
		Ans trebalh e consir
		Si que mos chans
	80	Es ja pres del delir.
IX		E deuria·l mandar
		Mo Sobre-Totz e dir
		Que·l maier dans
		Er seus, si·m fai falhir!