Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,033 Autor: Giraut de Bornelh Gènere: Canso Número: LII

 

En un chantar

I	1	En un chantar,
		Que dei, de ces
		Volh metre ponha que de·manhs
		M’escus que·m n’aveni’a far.
	5	Car anc no·m fezi fort preiar,
		Mentre que bos chans fo grazitz;
		Mas qu’er’es tan mal acolhitz
		Jois e solatz,
		No sai com entre tans iratz
	10	Ja sia sols conhdes ni gais
		Ni com en bo chantar m’eslais.
II		E no compar,
		Si no·l degues,
		Per can val l’onors ni·l gazanhs
	15	Qu’er n’aven als amics, d’amar
		Ja·m n’avengues mais a pensar,
		Mas estera·n demenhs marritz
		Jostals rics avols embronsitz
		Cui bes ni patz
	20	Ni cortz ni dos ni pretz no platz;
		Tan penson d’ us vilas assais
		Don mals e no-fes brolh’e nais.
III		E chastiar
		No·s volon ges,
	25	Per que m’er lor solatz estranhs,
		Pos vei que no n’er de cobrar
		C’a forsa·m n’aven a parlar,
		E peza·m, car jois es falhitz,
		E vauc per una chamjairitz
	30	Desconortatz
		Cui fui, mentre·m semblet vertatz
		Sa mensonha, fis e verais,
		En qu’ela·m galiet e·m trais.
IV		E·m fetz cudar
	35	Que menhs valgues
		Fis argens esmeratz qu’estanhs
		C’oi res no·m podi’assenar.
		Mas era·m lais aconselhar
		E conosc, can sui eissernitz,
	40	Que damnatges sembla petitz,
		Pos es passatz;
		Be sai qu’enan n’es om iratz,
		Mas pois s’en vai la pen’e·l fais.
		Fols es qui de l’amar s’irais!
V	45	E·m fetz lonhar,
		Tan me promes,
		De clams e d’iras e de planhs,
		Si com m’avetz auzit comtar
		Que·m solia d’un gan clamar
	50	Que·m fo de gran damnatge guitz.
		E pois la mal’abetairitz
		Chamjet me datz
		C’aissi com m’en er’alegratz
		Me fo pois irables esglais
	55	Qui ab sa mal’amor m’atrais.
VI		E car fizar
		No s’i pot res,
		An pur co·s poscha cel barganhs,
		C’assatz lo·m posc leu oblidar;
	60	C’un joi, que·m fai d’Amor lauzar,
		Cel que m’es dins el cor aizitz
		Fis e ferms e que·m fo cobitz,
		Ans que fos natz,
		E si be·s m’er’aitan tarzatz,
	65	Be sai d’Amor c’anc no·l m’estrais,
		Mas ponhava co·m valgues mais.
VII		Apres l’anar
		C’avem empres
		Lai on es lo comunals banhs,
	70	Si Deus nos o don’achabar,
		Cut esser pro fis c’al tornar
		Si’ amics onratz e jauzitz.
		E vos, Senher, c’anc no mentitz,
		Lai no·ns gicatz
	75	E dels Sarrazis aesmatz
		Com la lor leis ombriva bais
		E cela poi que·ls savis pais!
VIII		E ja, Senher, no consentatz
		Que l’avols gens vas me s’eslais,
	80	Ans sion chassat part Roais!