Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,046 Autor: Giraut de Bornelh Gènere: Pastorela Número: LV

 

Lo dolz chans d'un auzel

I	1	Lo dolz chans d’un auzel,
		Que chantav’en un plais,
		Me desviet l’altrer
		De mo chamin e·m trais
	5	E josta·l plaissaditz;
		On fo l’auzels petitz,
		Plaisson en un tropel
		Tres tozas en chantan
		La desmezur’e·l dan
	10	C’a pres jois e solatz;
		E vengui plus viatz
		Per melhs entendre·l chan
		E dissi lor aitan:
		‚Tozas, de que chantatz
	15	de que vos clamatz?‘
II		E cobret so mantel
		La maier, que saup mais,
		E dis: „D’un encombrer
		Que mou dels rics savais.
	20	Per qu’es jovens delitz;
		C’aissi com pros es guitz
		Ab bo pretz, que·l chabdel
		E·l cresch’e·l par enan,
		Se son mes a so dan
	25	Li peior dels malvatz;
		Que, si vos alegratz
		Ni·n faziatz semblan,
		Ilh vos aguizaran
		Com ja joi non aiatz,
	30	Si ges lor etz privatz.“
III		‚Toza, ges tan isnel
		No son vas bos assais
		Com foron li primer,
		Can aondava jais
	35	E chans era grazitz.
		Qu’eu eis, don sui marritz,
		No trop sol qui m’apel
		Ni·m quera ni·m deman;
		Ans fui raubatz ogan
	40	Entre tres reis prezatz
		Si que l’us dels renhatz
		M’o vai contrarian,
		E parec al ferran
		Que m’era gen donatz
	45	E fo mal prezentatz!’
IV		„Senher, d’avol fardel
		Se chargu’e d’avol fais
		Qui rauba soldader
		Ni s’en vest ni s’en pais,
	50	E·l locs es molt aunitz
		On el es acolhitz.
		Aital lairo fradel
		Ple de mal e d’engan
		Si ja·l sofre ni·l blan
	55	Nulh’alta poestatz,
		Greu pot esser onratz,
		Que be leu se diran
		Cilh que non o sabran
		Qu’el eis n’es encolpatz
	60	O·lh n’eschai la meitatz.“
V		‚Ami, el tems novel
		Soli’om esser gais;
		Er no vol om verger;
		Entro que·l fruchs l’engrais,
	65	Ni no platz chans ni critz.
		Totz lo mons es marritz
		E plus li jovensel
		Que nulh conort no fan;
		Qu’eu vi que per un gan,
	70	Si lor fos enviatz,
		Se mesclav’us barnatz
		Que durava tot l’an;
		Er vos escondiran
		Lor daufas amistatz,
	75	Pos qu’en fo·l pretz triatz.‘
VI		„Senher, li fort chastel,
		Don la maleza nais,
		E li mur e·lh terrer
		De tort e de biais
	80	An tolt dos e convitz;
		Qu’er non es om garnitz,
		Si no fai manganel
		Que pas sobre l’anvan,
		Don ira pois cridan
	85	Us vilas enrabiatz
		Tota la noch: «Velhatz,
		Qu’eu ai auzit mazan!»
		Et adonc levaran.
		E vos, si no·us levatz,
	90	Seretz ochaizonatz.“
VII		‚E que·m val, si·m revel,
		Amia, ni m’irais?
		Cudatz vos que·lh derrer
		Se metan en eslais
	95	Per aitals colps petitz;
		Ni joves endurzitz,
		Pos que·l tir a la pel,
		Se venha melhuran
		Per pauc colp de verjan
	100	Ni que·s fassa viatz
		C’us vers prozom preiatz
		Se don a parsonan?
		Doptara pois l’afan
		E·s tenra per grejatz,
	105	Si gaire·lh demandatz.‘
VIII		„Si·l senher de Bordel,
		Amics, no·n sofre·l fais
		E no·s da consirer
		Com del tot non abais
	110	Lo mons, fos o peritz!
		Que, pos jois er falhitz,
		Re tot l’als non espel
		A bo pretz benestan,
		Ni ja lai non iran
	115	Ni Deus ni fes ni patz
		O·l senher renh’iratz;
		Ca lui s’azesmaran
		Cilh qu’entorn lui seran,
		E, pos que jois li platz,
	120	Alegran s’en totz latz.“
IX		‚Toz’, eu m’irai laissan
		De chantar mais ogan,
		S’a mo Sobre-Totz platz,
		Qu’eu no sui enastratz.‘
X	125	„Senher, li dui Bertran
		Sai be que vos diran
		Que·us etz mal conselhatz,
		Si del chan vos laissatz.“
XI		‚Toza, totz dezonratz
	130	Es c’ama dezamatz.‘
XII		„Senher, sofretz en patz;
		C’aissi seretz amatz!“