Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,075 Autor: Giraut de Bornelh Gènere: Canso Número: LXIII

 

Solatz, jois e chantar

I	1	Solatz, jois e chantar
		Es eras oblidatz,
		Mas tan es alt poiatz
		Lo mals que non a par,
	5	Per que pretz e jovens
		E bels chaptenemens
		En son motz deschazatz,
		Si c’als plus rics baros
		En ave mals ressos,
	10	Et estera lor be
		C’us quecs penses de se;
		Car Deus als plus prezatz
		Donet las eretatz.
II		Et anc per trop donar
	15	Senes altras foldatz
		Rics om no fo cochatz
		Ni per so gen-estar,
		E si nuls ditz: «Tu mens»,
		Que sia conoissens:
	20	Eu sui ben assermatz;
		Que per dichs autoros
		Farai creire als bos
		Qu’eu dic ver, per ma fe,
		Que per bos fachs s’ave
	25	E per adrechs perchatz
		Onors ab grans rictatz.
III		E donc ric om’avar,
		Can ben es aguzatz
		E no·n garis, onratz
	30	Se deu be pauc prezar;
		Car entre bonas gens
		Qui mais a e val mens
		Deu esser mens nomnatz
		E, can el er rescos,
	35	N’er gaps entrels plus pros
		Aitals com se conve,
		Et el sapcha desse
		C’anc nuls om rics malvatz
		No fo per Deu salvatz.
IV	40	Per c’om se deu gardar,
		Mentr’es alezeratz,
		De faire grans pechatz
		E de tot mal-estar;
		Que·l segles es niens!
	45	Donc per esser manens,
		Voletz esser blasmatz?
		Oc be, si voletz vos
		Aver mais qu’esser pros;
		Que pretz no s’esdeve,
	50	Can om no fai per que,
		E s’eu re be no fatz,
		Per que serai lauzatz?
V		Mas un en sai que·m par
		Trop ben aministratz
	55	De far rics fachs prezatz,
		De be-dir e de far
		E de bos fachs sabens;
		Qu’es cortes e plazens,
		Umils, de bel solatz
	60	E ja no·lh chal a nos
		Donar dels esperos,
		Ans es, s’om no·l rete
		Trop duramen el fre,
		Vas pretz tan eslaissatz
	65	C’un pauc en sembla fatz.
VI		Reis n’Anfos, cel c’us fe
		Volha c’ades siatz
		Plus pros e mais prezatz!