Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,023 Autor: Giraut de Bornelh Gènere: Canso Número: LXIV

 

Molt era dolz e plazens

I	1	Molt era dolz e plazens
		Lo tems gais, can fon eslitz
		Paratges et establitz;
		Que·ls drechurers, conoissens,
	5	Leials, francs, de ric coratge,
		Plazens, larcs, de bona fe,
		Vertaders, de gran merce
		Establit om de paratge,
		Per que fo servirs trobatz,
	10	Cortz e domneis e donars,
		Amors e totz ben-estars
		D’onor e de gran drechura.
II		E paratges e bos sens
		Den esser chabdels e guitz
	15	De totz enters bes complitz;
		Per que las primeras gens
		Doneron al ric linhatge
		Rendas que tenguesson be
		So c’a paratge conve.
	20	E donc qui te l’eretatge
		Ni·l feu, don el es chazatz,
		No serf, com vol esser pars
		Als pros? Mais tot l’er pensars
		De far so don pretz melhura.
III	25	E de domnas eissamens
		Fo ja lor bos pretz auzitz
		Per tot lo mon e grazitz
		E fazion onramens
		E fachs de gran vassalatge
	30	Li fort linhatge d’ancse
		Qu’er’an tornat a no-re,
		E tenon a nesciatge,
		Qui lor vol esser privatz,
		Mas fals maldirs e gabars
	35	Lor platz e suau-parlars
		Ab celas de lor mezura.
IV		E donc om fals, maldizens,
		Perjurs, avars, deschauzitz,
		Desconoissens, apostitz,
	40	Pos renb’ab galiamens,
		Lauzengers e ples d’oltratge,
		Pos tot paratge mescre,
		Be volgra saber per que
		Vol aver nulh senhoratge,
	45	Mas no·s conois on fo natz!
		Que bos pretz es aitan chars
		Que no·l sap comprar avars;
		Mas l’altrui be-fach rancura.
V		E cilh ab los fers luzens
	50	Dels altruis drechs enriquitz,
		Que viran tost la cervitz
		Lai on tanh’acolhimens.
		Son vila per plan uzatge,
		E totz om pros que·ls mante
	55	Aontis paratg’e se
		E, si tot no m’es salvatge,
		Car ab lor no·m sui molhatz
		De la ploia que s’espars,
		No·m platz lor vilaneiars,
	60	Per qu’ilh me fan char’escura.