Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,052a Autor: Giraut de Bornelh Gènere: Sirventes Número: LXIX

 

No·s pot sofrir ma lenga qu'ilh no dia

I	1	No·s pot sofrir ma lenga qu’ilh no dia
		So que mo cor li dai en mandazo;
		Car lo cor fai a guia de baro,
		Qu’en comanda a los membres tot dia.
	5	E per so, si tals dichs non es vezis
		A cortezia, be mi par devis
		Que la lenga s’escus per senhoria,
		Car es del cor ancela ses bauzia.
II		Lo segle s’es chamjatz de cortezia
	10	En vilanatges et en perdizo;
		Plus es lauzatz qui tot tol a bando
		Que cel que dona per sa manentia
		C’ardis lo crois sordeiors e mesquis
		L’us aib l’altre. Tals e tals vai rapis
	15	Pel seu donar, e per sa trufardia
		Gardem nos be d’aital poestaria!
III		Donc non a locs so que sol Pauls aprendre
		Que dizia en son escrit aissi:
		„Plus es lauzatz qui don’al seu vezi
	20	Que cel que pren“ qu’er sol franqueza vendre,
		Ni no conselh de mandar jutjador
		Cal sia melhs e de maior lauzor,
		Prendre o dar; car li croi volran rendre
		Garentia: no val tan dar com prendre.
IV	25	E si li bo volran lor drech defendre
		Contra los crois, ni lo ser ni·l mati
		No·l poiran far, si com pens dins de mi,
		Car trop es fortz lor tortz per escoissendre.
		Car per un bo son cen li sordeior,
	30	Donc qu’en valgra la garentia lor
		Contra los crois, cuis cbaps poscha Deus fendre?
		Pauc o nien, so posc per drech entendre.
V		E pos li bo perdut an la poissansa
		E·lh savai croi e·lh janglos lauzenger
	35	Tolguda l’an ab fel cor brau e fer,
		Qu’i faran ilh, si Deus no fai venjansa?
		Remarran ilh de proar lor talan?
		No·l lor conselh, si Deus mi do bon an!
		Melhs am be far ses aver nulh’onransa
	40	Qu’esser prezatz ab malvaia bombansa.
VI		Car eu am mais, de bo cor ses enfansa,
		Esser anheus en prat oz en verger
		Que lops ni ors, si tot ai consirer
		D’esser trenchatz o d’aver greu pezansa.
	45	Car qui mor bos, sivals gazanha tan
		Quez apres se Deus lo vai onoran,
		E laissa rics sos filhs de sa nomansa;
		El mon non es rictatz de tal engansa!
VII		Amics Bertrans, qui etz conoissens tan,
	50	Paucs en conosc c’ab vos valhon un gan.
		Conortatz vos qui avetz ses doptansa
		Rics pretz conquis! tenhatz lo en membransa!