Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,054 Autor: Giraut de Bornelh Gènere: Canso Número: LXVI

 

Obs m'agra,     Si m'o consentis

I	1	Obs m’agra,     Si m’o consentis
		La sazos del tems entenerc,
		Qu’en cal que solatz m’esjauzis;
		Que contral frech m’agr’obs vestirs
	5	E contral tort, qu’eu pren, merces
		E contral trop tazer chantars
		E contral chamje dels baros
		Francs senher e cortes e bos.
II		E jagra     Plus chald los matis,
	10	Si·m sentis mos obs dins l’alberc
		Que ja forsatz fors no n’issis;
		Que pena m’es a mans grazirs.
		E qui soferre s’en pogues,
		Be fora nauza demandars;
	15	E pero, si donars no fos,
		Ja no saubr’om qui·s fora pros.
III		E plagra     Mais a mos vezis
		Manens que paubres; que, pos cerc
		Totz mos obs, us no m’er tan fis.
	20	Pro vetz no l’enoi l’escondirs.
		E qui trop frez’altruis conres,
		Sofranhera·lh cals que disnars
		E, pos s’aficha ses somos,
		Sembla·lh falha pas e maizos.
IV	25	Be·s pagra     Genseis, so m’es vis,
		Enquera sobre son ausberc,
		S’altra mandaula li falhis,
		Del seu, que trop n’es bels servirs,
		E qui·s fai de l’altrui cortes,
	30	Pos del seu sera sobravars,
		Ges no m’es vis aport razos
		C’a lui repaire·l gazardos.
V		Ges magra     Forsa l’altrui vis
		No m’a, s’eu m’oblit ni m’esperc
	35	De far aco c’om me grazis.
		E pero si bels acolhirs
		No dona pretz mas lui cui es
		C’aissi com chascus es plus chars,
		Degra voler que bels ressos
	40	Issis ans de lui que de vos.
VI		S’om agra-     men no m’acolhis,
		Si·m ponh ni manei ni m’esterc
		Los jovensels ni·ls enantis,
		Genser en paregra·l forbirs;
	45	Mas qui fara semblan que·lh pes
		Ensenhamens ni chastiars
		E vos trebalhatz c’altre fos,
		Franher i podetz mil bastos!
VII		Per sagra-     men, c’om me plevis,
	50	No creiria c’ans fem que·i perc
		Mos chastics que tos ben assis,
		Pos trop l’esfreda l’apertirs,
		Ja colh’ardit, desc’aura mes
		S’enteneion en sos afars;
	55	Que, mentre qu’ es mancips e tos,
		L’ eschai solatz e pretz e dos.
VIII		Podagra,     Don ja no garis,
		O grans meschaps en pla condere,
		Tals qu’el plus lonh adens l’auzis,
	60	O fachs don se seg’escharnirs
		O peitz volria l’avengues
		Cui jois no platz ni deportars;
		Que mans pensamens enoios
		Lonha desse bona chansos.
IX	65	Senher Sobre-Totz, rics pensars
		E jois e bona sospeissos
		Cresch’ades Mo-Senbor e vos!
X		Qu’eu·m clam enquera dels Navars;
		Car anc deschauzitz sofrachos
	70	Entr’els me fo contrarios!