Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,030 Autor: Giraut de Bornelh Gènere: Canso Número: LXXII

 

De chantar     Ab deport

I	1	De chantar      Ab deport
		Me for’eu totz laissatz;
		Mas can sui ben iratz,
		Estenh l’ir’ab lo chan
	5	E vauc me conortan.
		Qu’esters no fora patz
		Entre l’ir’e·l coratge
		Qu’es contr’un mal uzatge,
		Que nais e poi’e creis,
	10	Qu’er’es falhitz domneis,
		Don sol om esser gais,
		E pretz no pot ni jais
		Revenir entretans;
		Car es de cels clamans
	15	Per cui degra valer
		E ges pretz ses poder
		Longamen sas no dura,
		Ses clam o ses rancura.
II		Alegrar     Me volh fort
	20	E sui aissi passatz
		E, si no sembles fatz,
		No·n chamjera·l talan.
		Mas teno·s a mazan
		Mans bos sonetz qu’eu fatz
	25	Vila d’ avol linhatge,
		C’anc pros om de paratge,
		S’en ben auzir ateis,
		De l’escoltar no·s feis
		Ni·l plazer no n’estrais.
	30	E non es be savais
		Cui jois no platz ni chans?
		Et es daufeza grans,
		Qui no sap retener
		Bel agrat ni plazer
	35	E·s defen ni·s rancura,
		Si l’altrui jois se dura.
III		E no·us par     Peitz de mort
		C’om cui s’atanh solatz
		Viva desconortatz
	40	Ni fassa mal semblan?
		Al ver Deu me coman,
		En cal ora fo natz
		Ab aital cor salvatge!
		Que l’auzel el boschatge,
	45	Can lo dolz tems pareis,
		Movon entr’els mezeis
		Sonetz e critz e lais,
		E qui ja non er gais,
		Com pot esser durans?
	50	Res mais non es afans
		Mas ira sostener
		Ni res tan mal saber,
		Quez ab sen se melhura,
		Com ira no peinura!
IV	55	D’un afar     Me conort,
		Don degr’esser iratz;
		Que be·m fora clamatz
		De so que l’alsor fan
		E del mal e del dan
	60	Que·ls en a desviatz,
		Mas en gran volpilatge
		M’an mes vila passatge
		Qu’eu·n parlera forseis!
		E·l senher, que·m n’espeis,
	65	Can m’abatera·l fais,
		A·m comandat que mais
		No·n sia corelhans
		Plus qu’ilh son de lor dans,
		Ni d’altrui no-dever
	70	No·m poscha molt chaler!
		Ni·m chal si be·s peiura
		Lor afars ni·s melhura?
V		Bo proar     M’agr’a sort
		Un dels melhors letratz
	75	Si ja venra vertatz
		Ni viures ses engan
		Ni si ja cobraran
		Jois, deportz ni barnatz
		Lor ancian estatge,
	80	No·n metria ges gatge!
		Tan poia·l mals anceis
		E drechura ni leis
		No vei aissi verais
		Com ja dis ni retrais
	85	Establimens ni mans;
		Per que dezerenans
		Estart al remaner
		E, si del chaptener
		Deus no pren cal que cura,
	90	Nos n’irem l’ambladura!