Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,073 Autor: Giraut de Bornelh Gènere: Canso Número: LXXIII

 

Si per mo Sobre-Totz no fos

I	1	Si per mo Sobre-Totz no fos,
		Que ditz com chan e sia gais,
		Ja·l suaus tems, can l’erba nais,
		Ni pratz ni rams ni boscs ni flors
	5	Ni durs senher ni van’amors
		No·m poirian metr’en eslais!
		Mas d’aisso·m tenh ab lui
		Que, pos jois falh e fui,
		Merma pretz e barnatz,
	10	E, pos las poestatz
		S’estranheron de jai.
		De can que·l peier fai,
		No fo per me lauzatz
		C’aissi·m sui conselhatz
	15	Que nulh ric non envei
		Qui trop mal senhorei.
II		Cela vetz era·l segles bos,
		Can per tot er’acolhitz jais
		E cel grazitz cui n’era·l mais
	20	E pretz s’aveni’e ricors.
		Qu’er’apel’om pros los peiors
		E sobra cel que peitz s’irais
		E cel que mais adui,
		C’onques pot, de l’altrui,
	25	Sera plus enveiatz.
		De que·m tenh per forsatz
		C’om d’avol plach savai
		Colha bo pretz verai,
		Don degr’esser blasmatz;
	30	E vos car no pensatz
		Si·s tanh c’om pretz autrei
		Celui que lach felnei?
III		Mal fo chabdelada razos,
		Desc’om per pros tenc los savais,
	35	E·ls francs e·ls cortes e·ls verais
		Razonet om per sordeiors,
		E moc la colpa dels alsors,
		Can devers becilhet ni frais.
		Qu’era no sai per cui
	40	Tol om l’onor celui
		Que n’er’a drech chazatz,
		E si·ls en corelhatz,
		Diran que be n’estai;
		Car cel qu’eu no dirai
	45	Sera melher amatz,
		E pois, si·us embargatz
		De pretz ni de domnei,
		Mes avetz el conrei!
IV		Eu vi c’om prezava chansos
	50	E que plazian tresc e lais.
		Era vei que, pos om s’estrais
		De solatz ni de fachs gensors
		Ni l’afars dels fis amadors
		Se viret de drech en biais,
	55	Que totz devers defui.
		Que ges, s’om se deblui
		Las charns ni·ls vis ni·ls blatz
		En fol acompanhatz,
		A pretz non o tenrai
	60	Ni crezutz no·n serai?
		E no·m segra·l perchatz;
		Que lai val pauc rictatz
		Qui la men’a desrei
		Ni drech no·i sec ni lei!
V	65	Er’auch del rei qu’era plus pros
		E plus valens en maus assais
		De totz cels que vianda pais,
		Que sobret mejas e maiors
		E crec sos pretz e sas onors
	70	E no temi’afan ni fais,
		Que, si lo planhon dui,
		Lo tertz lor o destrui,
		Que·m par mal ensenhatz.
		Qu’eu no cut c’anc fos natz,
	75	De Charlemanh’en sai,
		Reis per tan bel assai
		Mentaugutz ni prezatz;
		Mas ja leu no crezatz
		C’afars tan mal estei
	80	Qu’ensems lo planhan trei!
VI		E que val donc bela faissos
		Ni grans poders c’aissi s’abais ?
		E ja passava part Roais
		Lo noms e·l pretz e la paors
	85	Entrels paias galiadors,
		C’anc us sols plus arer no·ls trais!
		Per que falh qui·s desdui,
		Pos aissi leu s’esdui
		So c’om plus vol ni·lh platz,
	90	De que tenh per grevatz
		Cels que mais podon sai,
		Si non adoban lai,
		Can chamjara rictatz,
		C’aian cal que solatz
	95	De lor gran charlabei
		Denan lo maior rei.
VII		Que·l trafas segles enoios
		Dona pretz celh que plus atrais,
		Sonh non a mas que·l cors s’engrais
	100	E fassa, c’onques pot, so cors
		E l’arma pert ses lo socors
		De lui cui sos convens enfrais;
		C’us tan gen no s’estui
		Ni no·s serra ni·s clui
	105	De bels murs batalhatz,
		Can sera lai passatz
		Al port on no s’eschai
		C’om merme son esmai,
		Totz no si’enserratz.
	110	Per qu’es conselhs senatz
		C’om de sai se chastei
		Que sos tortz lai no·l grei.
VIII		Lui prec, qu’es sols clamatz
		Us Deus e Trinitatz,
	115	Que·m gart qu’eu no folei
		Sai tan que lai me grei.
IX		E chascus lo cor tei
		Que sos tortz lai no·l grei!