Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,003 Autor: Peire Bremon Ricas Novas Gènere: Canso Número: VIII

 

Ben farai canson plasen

I	1	Ben farai canson plasen,
		si puosc, qu’er leus per cantar,
		car dison ce mon trobar
		comensiei trop sotilmen ;
	5	ma li bon coneisidor,
		ce sabon causir,
		tenon, so m’albir,
		so ce mais val per meglior ;
		per c’a mon grat farai canson cabal,
	10	bella donna, de vos, per cui pres val.
II		Anc re non vi tan plasen,
		dompna, con vostre cors car ;
		per c’ab gioi dei merceiar
		mon cor, mos uogll[s] e mon sen,
	15	ce·us m’an dat per servidor ;
		e dei lur grasir,
		car mi fan murir
		desiran la vostr’amor ;
		e si tut muoir, dei aver gioi coral,
	20	car nuls viure[s] mon dos morir non val.
III		La beutat e·l ris plasen
		que·us fan dintç mon cor intrar
		non puosc anc pro remirar,
		c’ades n’ai major talen
	25	con plus mir vostra color.
		Un[s] gioi[s] ab desir
		mi fai esgiausir,
		can vei la nova frescor,
		e·l bels vesers m’aleuja del greu mal
	30	qe·m sen, donn’ ab cui gauçimen[s] no val.
IV		Aisi·m dones gioi plaisen
		con es de valor sen par,
		dompna, c’ab dret dei giugiar,
		e par ben al convinen
	35	que dic vos vera lausor ;
		ce de vos servir
		son tut miei consir,
		e tenc m’o a tal onor
		c’en dret d’amor de nul’atra no·m cal
	40	e desir vos, ab cui merces no·m val.
V		Si·m degnes eser plasen
		q’ieu l’auses merce clamar,
		de gioi me·n vengr’a plurar,
		tant n’agra mon cor gausen ;
	45	e car me·n deras legor,
		degras mi sofrir
		c’ieu vos auses dir
		e mostrar ma greu dolor ;
		ce dompna deu a servidor lial
	50	ben sofrir so de c’ela mens no val.
VI		Dompna, non dic per clamor
		ren ce m’augias dir,
		q’en pas voigll sufrir
		l’afan don sospir e plor ;
	55	car ses forfac mi das turmen mortal,
		per c’er pecatç, s’ab vos merces no[·m] val.
VII		Quals qe lauze la meglior
		vos sap gen servir,
		e no·i po[t] faglir,
	60	ab que lause la gensor ;
		de vos [o] dic, dompna, se Dieu[s] me sal,
		que·l gensers es e nenguna no·us val.