Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,015 Autor: Peire Bremon Ricas Novas Gènere: Canso Número: XIV

 

Pus que tug volon saber

I	1	Pus que tug volon saber
		per que fas mieja chanso,
		ieu lur en dirai lo ver :
		quar l’ai de mieja razo ;
	5	per que dey mon chant meytadar,
		quar tal am que no·m vol amar ;
		e pus d’amor no·i es mas la meytatz,
		ben deu esser totz mos chans meytadatz.
II		Tan hi ai mes mo voler,
	10	que per oc penrai lo no,
		et am mais de lieys l’esper
		que d’autr’aver guiardo.
		quar ylh non a de beutat par,
		d’aculhir ni de gent honrar,
	15	per que mos cor es en lieys tan fermatz
		qu’en dreg d’amor autra del mon no·m platz.
III		E pus a tot son voler
		me ren e m’autrey e·m do,
		merces me degra valer ;
	20	pero sieus serai e so,
		qu’Amors la·m fai tan dezirar
		on que m’an, qu’al re no puesc far ;
		e tan me plai sos sens e sa beutatz
		qu’ops m’es qu’ieu l’am, si tot no suy amatz.
IV	25	Sabetz per que·m dey alegrar,
		plazenz dona ? — Quar m’aus pessar
		qu’enquer per vos poiri’esser amatz :
		veus tot lo joy per qu’ie·m suy conortatz.