Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,018 Autor: Peire Bremon Ricas Novas Gènere: Sirventes (de réponse) Número: XVII

 

Tant fort m'agrat del termini novel

I	1	Tant fort m’agrat del termini novel
		per lo dolz joi en que Amors m’a mes,
		que tot qant fatz ni dic m’es bon e bel,
		e vuoil cantar a guisa de cortes,
	5	car no m’es bel c’ab lausengier contenda.
		E vos digatz, En Sordel, que volres,
		pero qui fai assatz es qui aprenda
		et eu apren voluntiers totas ves.
II		Fe q’ieu vos dei, bels amics En Sordel,
	10	(et er me greu si ja no m’en creires)
		ja per laich crim non portetz croi capel,
		qu’eu non fi ges de vos lo sirventes,
		ni no m’es bel q’ieu de re vos mesprenda ;
		anz dic a totz, car sai c’onors vos es,
	15	qez anc nuills hom non ac tan longa renda,
		ni non enten qe anc joglars fosses !
III		Soven feretz d’espaza e de coutel ;
		pois garnitz es, ben a gauch qui·us vezes.
		Dels cavalliers semblatz del bagastel
	20	quand el caval etz pojats ab l’arnes,
		e no·us cuidetz q’ieu en luoc vos atenda
		pois q’ieu veirai c’ab armas seretz pres ;
		e pos vas vos non ai cor que·m defenda,
		si Dieus vos sal, miser, vailla·m merces !
IV	25	Si’n Reforsaz dis c’ad Ais al macel
		manjassetz ren don vos sobrepreses,
		anc non compretz ni ventre ni budel,
		ni caps ni pes ni fetges ni bescles,
		ni nuilla ren don hom vos sobreprenda ;
	30	mas car dissetz c’Amors vos reten pres,
		seign’En Sordel, sobre mi pren l’esmenda
		d’aquel pechat que per amor fares.
V		Pois q’ieu vinc sai, non aflibiei anc pel
		don sembles lop ni semblar no·l voil ges.
	35	Be·m saup gardar, a l’issir, del clavel
		que sobre·l pe non remasses mespres,
		ni mos seigner no·m cuich que m’en reprenda,
		que conseil n’ac de lui anz sai vengues ;
		mas pregem Dieu, En Sordel, que car venda
	40	las trachios que fant fraigner las fes.
VI		Si tot avetz, En Sordel, longa renda,
		non es joglars, e si joglars fosses,
		non fes nuill temps — mas non q’ie·us en reprenda
		tant faos joglars dos tant crois sirventes.