Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,009 Autor: Elias de Barjols Gènere: Canso Número: XI

 

Morir pogr'ieu, si·m volgues

I	1	Morir pogr’ieu, si·m volgues
		e·l vostre poder, amors,
		que ia no·m volgratz far socors
		en tal loc m’aviatz mes ;
	5	per qu’es fols qui no·s desvia
		de so don no·s pot iauzir,
		e selh qu’o met en sufrir
		es fols e sec sa folhia.
II		Hueymay no suy vostre pres,
	10	per que·m puesc virar alhors,
		e fug a·ls sospirs et als plors
		et a las malas merces
		de vostra grieu senhoria,
		amors, tan qu’alhors me vir ;
	15	e suy iratz del partir
		si be·l colpa non es mia.
III		Ses colpa no suy ieu ges,
		qu’a la belh’on es valors
		e fin pretz e vera lauzors
	20	cugey amar me degnes ;
		ben aigui pauc sen lo dia !,
		mas amors la·m fetz chauzir
		e miey huelh per que·ls n’azir
		e ia mais no·ls ne creyria.
IV	25	Amors, anc pro non tengues
		als vostres amics melhors,
		mas als fenhens gualiadors
		que vos meton en disses
		donatz de ioy manentia,
	30	amors, e faus escarnir,
		e ia no·us degr’ abelhir
		fals amics ni fals’ amia.
V		Amors, pus no·us plai mos bes
		a mi no plai vostr’ onors ;
	35	pero, forsatz en fas clamors
		e no·us pessetz que·m tolgues
		de vos, si bes m’en venia ;
		e quar no m’en pot venir
		ni no·n ai mas lo dezir,
	40	tuelh m’en e tenc autra via.
VI		Pros comtessa, on que sia,
		Biatritz, puesc per ver dir,
		que·l genser dompn’es que·s mir
		e pretz per melhor vos tria.