Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Codi: 124,001 Autor: Daude de Pradas Gènere: Canso Número: I

 

Ab lo douz temps que renovella

I	1	Ab lo douz temps que renovella,
		vuoill faire novella chansso,
		c’amors novella m’en somo,
		d’un novel joi que mi chapdella,
	5	e d’aquest joi autre jois nais ;
		e s’ieu non l’ai, no·n poirai mais,
		mas ades ador e soplei
		a lieis cui am de cor e’nvei.
II		Tant mi par m’esperanssa bella
	10	que be·m val una teneso ;
		e puois espers mi fai tal pro,
		ben serai rics si ja m’apella
		ni·m ditz : « Bels doutz amics verais,
		ben vuoil que per mi siatz gais,
	15	e ja no·is vir per nuill esfrei
		vostre fis cors del sieu dompnei. »
III		Ar ai dich so qe·m plazeria ;
		e sai que no·is pot avenir,
		que dompna non ditz son desir,
	20	anz cela plus so que volria.
		De son amic se vol honrar,
		e fai·s ades plus a pregar
		on plus la destreing sos talans ;
		mas ben val dir los bos semblans.
IV	25	E qui ren sap de drudaria,
		leu pot conoiser et chausir
		qe·il beill semblan e·il doutz sospir
		non son messatge de fadia ;
		mas talant ha de fadiar
	30	qui so que ten vol demandar,
		per qu’eu conseill als fis amans
		que prenden fassan lor demans.
V		Mout sai qe·m tenran ad ufana,
		car eu ai dich que fis amics
	35	i fai mout que pros e que rics
		si, qan pot, de si donz s’apana ;
		mas non cuich far negun orguoill,
		si la ren qu’eu plus am e vuoill
		bai e abratz, e vuoill saber
	40	si·l platz qu’eu aia nuill plazer.
VI		Lai on es proeza certana,
		vas Salve t’en vai, e no·t trics,
		chanssos, que·l seigner t’er abrics
		contra la folla gen vilana ;
	45	e·ls dos fraires de Rocafuoill,
		on fis pretz e jovens s’acuoill,
		sapchas a tos ops retener,
		si vols en bona cort caber.