Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,011 Autor: Arnaut de Maruelh Gènere: Canso Número: XXIV

 

Cui que fin' Amors esbaudey

I	1	Cui que fin' Amors esbaudey
		me torna tot en esmay,
		quar mon cor forsa d'amar lai
		on sai be qu'amatz no suy ges ;
	5	quar ylh es ses totas merces
		a cuy hieu suy hom et aclis ;
		et es ben menatz estra ley
		qui ten car so que l'avilis.
II		Ab aquesta domna domney,
	10	e l'am tan cum puesc ni sai,
		e muer, car s'amor [ges] non ai,
		qu'ieu sui sieus ; si a lieys plagues,
		de tot joy fora mos cors ples.
		Mai manhtas vetz tals s'enriquis
	15	que pueys es duptos que sordey ;
		per qu'ieu suefr' entre mals vezis.
III		Dregz es d'orguelh qu'orgulhos grey,
		e selh ditz ver qu'o retray
		qu'en pauc d'ora fenis e vay ;
	20	per qu'estet be que·l mieus cazes,
		quar soanei so que·m promes
		la genser dona qu'ieu anc vis,
		ni que sia el mon, so crey,
		luenh ni pres en negun pays.
IV	25	Greu er nulhs hom que non folley ;
		doncx s'ieu ai falhit, morrai ?
		Per merce li prec, qu'esper ai
		qu'a penas es hom tan cortes
		que non falhisca manhtas ves.
	30	E fara son dan, si·m delis,
		qu'ieu suy sieus, si tot mi guerrey,
		o si·l plai o si s'en marris.
V		No·l prec mas que s'amor m'autrey
		et ab aitan pauzarai.
	35	A ! bela domna, que farai ?
		Qu'el mon non es, mas quan vos, res
		que tan destrenher me pogues ;
		e si no fos lo guays e·l ris
		e·ls belhs semblans quez en vos vey,
	40	no·i agra res mas que moris !
VI		La nueg el lieg vir e torney,
		e·l jorn trassalh et esglai,
		quar nulhs hom pieitz de me non tray,
		ni cre que anc mais lo traisses,
	45	tan gran trebalh quon ieu fauc, res ;
		e trebalhs, quant hom no·l grazis,
		es pieger, que pel mieu o crey,
		e dels autres no suy devis.
VII		Tan no·m debat ni m'essaurey
	50	qu'ades non truep mon cor lai,
		quar alhors mas vas lieys no vay,
		qu'a sos pes l'a pauzat e mes.
		Ha ! si n'er ja levatz ni pres !
		non ja ! quar trop l'a prim assis ;
	55	e no sabran ja duy ni trey
		quals es selha que m'a conquis.
VIII		Na Ses Merce, trop s'afortis
		vostre durs cors encontra mey ;
		vejaire m'es qu'ieu mala·us vis.
IX	60	Dona, leos ja s'afranquis —
		et ieu on plus vos clam mercey,
		lo vostre fer cor s'afortis.