Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 009,013 Autor: Aimeric de Belenoi Gènere: Canso Número: V

 

No·m laissa ni·m vol retener

I	1	No·m laissa ni·m vol retener
		Amors, ni non li puesc fugir ;
		Ans me fai enaissi languir,
		Cum selh que cuyda d'aut chazer
	5	Quant en somnhans ve en son cor
		Sa mort, si chai, et a son for
		No conoys que·lh valha raubirs ;
		Aissi·m fai Amors e Sospirs
		Languir, quar nulhs joys no·m refranh
	10	L'afan de·l ric joy que·m sofranh.
II		Anar no·m n'aus, ni remaner ;
		Viure no puesc, ni aus murir ;
		Murir non quer, trop tem fallir —
		Mas no tanh qu'om se dezesper. —
	15	Viure no puesc, tant ai trist cor,
		Qu'om senes joy no viu, ni mor,
		Ans languis — per qu'a nom languirs,
		Quar auci — que·l corals dezirs
		M'aucira, si vauc o remanh,
	20	Quar lieys que·m pot guerir no·m planh.
III		Dieus ! qui o poc anc mais vezer ?
		Qu'on plus m'en luenh, plus la dezir,
		E plus l'am, on plus la remir :
		Quar tan la·m fai Valors valer
	25	E Beutatz abelhir, qu'e·l cor
		La tenc, e tot quant es defor ;
		Qu'a leys creys vezers e auzirs
		Grat de·ls pros, et a mi sospirs.
		Per qu'ieu muer quan de leys m'estranh,
	30	E muer quant ab leys m'acompanh.
IV		D'aquest mal no·m pot pro tener
		Res, mas silh que no·m vol guerir ;
		Ni joys d'alhor no·m pot venir,
		Quar ges no·m poiria plazer :
	35	Qu'anc, pueys qu'Amors la·m mes e·l cor
		No la trays nuls pessars a·l or.
		Quar mais mi platz honratz morirs
		Que vilhs entremesclatz jauzirs :
		Quar vils joys vilmens vay e franh,
	40	Per que no·m pot plazer, ni·s tanh.
V		No sai cum li·m fassa saber
		Mon cor, que quant hieu m'o cossir,
		Ades tem qu'autre s'o albir,
		E guart sai e lay, per vezer
	45	Si negus albira mon cor.
		Aissi cum val mays de fin or
		Thesaurs, que d'estanh, mos cossirs
		Val mays — si tot s'es fols l'albirs —
		D'autre cossirier, per qu'ieu franh
	50	Ab sen mon cor, que no·l gavanh.
VI		Dona Na Marguarid' auzirs
		E vezers, e gens aculhirs
		Provon que res no vos sofranh
		De so que a pro domna tanh.