Li Gotti, Ettore. Jofre de Foixà. Vers e Regles de trobar. Modena: Società Tipografica Modenese, 1952.

Codi: 304,002 Autor: Monge de Foissan Gènere: Canso Número: II

 

Be volgra fos mos cors tan regardans

I	1	Be volgra fos mos cors tan regardans,
		que ja en res, qu'hom leu perdre pogues,
		tot son esper ni s'amor non pauzes,
		qu’aitals perda non es mas mortals dans;
	5	qu’ieu amava ab tant ferm'esperansa
		midons qu'en als nulh esper non avia,
		e quant er vey perdut so qu'entendia,
		murir no puesc, mas be·n suy dezirans.
II		Qu'ieu ay perdut mos espers e mos chans
	10	e tot lo joy qu'ieu avia dels bes
		que·m fazia silh en cuy ja no·m pes
		cossegre mais, tant s’es voutz sos talans,
		no ssai per que, qu'ieu n'ai tal malanansa
		qu'anc pueys nulhs joys non ac ab mi paria,
	15	qu’adoncx perdey s'amor, quan mielhs crezia
		esser amatz, per qu'es mos mals pus grans.
III		Quar hom que pren mal don non es duptans,
		piegz n'a que selh qu'esta duptos ades;
		per que fora bos sens que hom penses
	20	qu'apres lo bo giet hom leu avol lans,
		que totz le muns cor en aital balansa
		qu'ades va jus so que de sus tenia;
		qu'ieu era guays, quant a midons plazia,
		aras non ai mas anguoyss'et afans.
IV	25	Pero ades qu'eu suy desesperans,
		volgr'ieu esser del tot sieus, si·l plagues;
		sieus si suy yeu, playa li o li pes;
		mas quar no·l platz, d'aitant suy malanans,
		qu'ieu y pert me e joy e benenansa;
	30	e si·l plagues, agra·n be qualque dia,
		mas aras par que destinat me sia
		tostemps viure doloyros e plorans.
V		Quan dels plazers, dona, suy remembrans,
		qua ja m'a faitz vostra bona merces,
	35	lo mals qu'ieu ai mi dobla per un tres,
		per qu'ieu volgra que·l mals vengues enans
		e qu'er fines en joy nostr’acundansa;
		quar mal ab be auci hom tota via;
		mas a mi par vulhatz vos, bell'amia,
	40	aucire mi, que·us suy sers e comans.
VI		Pus falhit ay, dona, en vostr'esperansa,
		totz le muns say huey mais que·m falliria
		per qu'ieu lays chans e joy e gualaubia
		e prendi plors e sospirs et afans.
VII	45	No·m say quo·us am ses esper, bell'amia,
		ni say cossi me·n puesqu'esser layssans.