Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,006 Autor: Berenguier de Palazol Gènere: Canso Número: VI

 

Dona, la genser qu'om veya

I	1	Dona, la genser qu'om veya,
		Sai, de belh aculhimen,
		Agradiv'a tota gen,
		Mas trop ten en gran enveya
	5	Selhs que deziron jauzir,
		Q'us non pot acosseguir
		D'un an so que'n cuyd'aver
		Quoras que la torn vezer.
II		Ren no promet ni autreya
	10	Ni estrai ni falh ni men,
		Mas « de no » sap dir tan gen
		Q'ades cuydaretz que deya
		Totz vostres precx obezir ;
		Pero, quan ven al partir,
	15	Sap sens colpa remaner
		Ab grat qu'en sap retener.
III		Tan gen despen e despleya
		Sa gran valor e so sen
		Q'una·l sieus laus non aten,
	20	E ja nulhs hom no·m mescreya
		De lauzor que·m n'auga dir,
		Qu'aitant hi pot hom chauzir
		De bon pretz fin e de ver
		Cum en dona pot caber.
IV	25	Sobre totas senhoreya
		De pretz, mas tan car despen
		S'amor, meravilha·m pren,
		Qui per sol sen la corteya
		Cum o pot guaire sufrir ;
	30	O·s fai ab art abelhir,
		O ylh a qualque saber
		On nulhs hom no·s pot valer.
V		Be vuelh que·m tenh', on qu'ieu seya,
		Per son leyal be volen ;
	35	Si tot joy non hi aten,
		Mos cors l'aclina e·l sopleya
		E·m platz tots sos bes auzir
		Et ajut ad enantir
		Sos laus ades, jorn e ser,
	40	En totz locs, a mon poder.
VI		Dieus me don l'ora vezer
		Qu'ie·lh puesca far son plazer.