Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,003 Autor: Berenguier de Palazol Gènere: Canso Número: VII

 

Aital dona cum ieu sai

I	1	Aital dona cum ieu sai,
		Rich'e de bellas faissos,
		Ab cors covinent e guay,
		Ab digz plazentiers e bos,
	5	Si volgues precs ni demanda[s] sufrir,
		Degr'om honrar, car tener e servir,
		Que no·y falh re que·m bona dompna sia,
		Mas quar Amors hi pert sa senhoria.
II		Sobre las melhors val mai
	10	Et es la genser qu'anc fos,
		Mas tan a ric pretz veray
		E tant es sos cors joyos,
		E tan gen sap tot quan vol far e dir,
		E tan se fai als plus honratz grazir
	15	Que·n pren orguelh, qu'es contra drudaria :
		Ve·us tot lo mal que ieu dir en sabria.
III		Amar e temer se fay
		Sovent a manht enveyos
		En cuy pauc de ben estai,
	20	Mas ab un semblan ginhos
		Et ab belhs digz o sap tan gen cubrir
		Per qu'om de lieys no·s pot claman partir,
		Q'us no s'en part, si son vol en seguia,
		Que no·y volgues tornar en eys lo dia.
IV	25	Anc no·s volc metr'en assai
		De nulh fait aventuros
		Per que pogues en folh plai
		Venir sos pretz cabalos ;
		Totz sos faitz sap acabar e complir
	30	Ab segur sen ses reguart de falhir
		E ses mal gienh, ses blasm'e sens folia,
		Ses enueg dir e senes vilania.
V		Quar denha sufrir ni·l plai
		Qu'ieu la laus en mas chansos,
	35	Del sobregran gaug qu'eu ai
		M’es complitz lo guazardos,
		Sol que·y saubes tan be esdevenir
		Cum agra cor e talan e dezir,
		E gran razo pus me en par n'auria,
	40	Mas no sai dir lo be que·y tanheria.
VI		Dompna, no puesc de vos lauzar mentir,
		Que tot lo be hi es qu·en puesc hom dir,
		E mais n'i a que hieu dir no sabria
		El remanens cab s'en vos tota via.