Frank, István. Ce qui reste d'inédit de l'ancienne poésie lyrique provençale. "Boletín de la Real Academia de Buenas Letras de Barcelona", 23 (1950), pp. 69-81.

Codi: 227,010 Autor: Guillem Peire de Cazals Gènere: Canso Número: II

 

Ja tant no·m cugiei que·m trigues

I	1	Ja tant no·m cugiei que·m trigues
		que d'Amors calque jauzimens
		no·m vengues, e qualque prezens,
		o calque merces no·i trobes :
	5	mai non la·i truep et es peccatz trop grans.
		Qu'aucire·m vol : e pus li play, m'aucia —
		a mi sab bon, s'a midons platz que sia.
		Mai ieu non cre que·l plassa nuls mos dans,
		car anc no·l fi per que plazer li deya,
	10	ni non ai cor qu'o fass' ; on pus mi greia.
II		De martir pogra far confes
		ma domn' ab un bais solamens,
		et ieu fora tostems jauzens
		s'a lieis plagues que lo·m dones,
	15	c'adonx agr'ieu complitz totz mos demans.
		Que can m'albir qui soy ni cal seria,
		de sol l'albir qui soy gais com s'ieu l'avia.
		Per qu'ieu serai aclis e merceians,
		tro per merce li plassa qu'ieu la veia,
	20	tan longamen e tal que mos prex veia.
III		S'om per ben amar conquistes,
		midons ben for' ieu conquerens.
		C'anc pus fis ni pus finamens
		non cug que nuls aimans ames
	25	ni miels d'Amors fezes totz sos comans.
		C'aissi·l soi fis c'om pus mi contraria,
		siec son coman e·l fas tot a sa guia
		e del tot soi contra·l sieu orguell blans.
		Per qu'ieu non crey c'ancar, cant que n'esteya,
	30	no·m autrey tot so c'ar mi desautreya.
IV		Atressi, domna, com vos es
		de las autras la plus plazens,
		la plus pros, la plus convinens,
		la genser c'anc vi lueinh ni pres,
	35	soi ieu [de totz] fis e lials aimans
		lo plus lials et ab mens de bauzia.
		E degratz ho conoisser, si·us plazia,
		car mais vos am e plus ses tot enjans;
		qu'on pus m'auzi vostr'amor ni·m guerreia,
	40	et plus assai qu'e us acli e ssopleia.
V		Per que·m sembla que be·us estes,
		pus tant vos soy obedïens,
		si·us prezes hueimai cauzimens
		de mi, que·m tant non malmenes
	45	vostre gent cors cuendes e benestans,
		on joys e pres e laus e cortezia
		e beutatz creis e dobla cascun dia.
		Per que del mens es tan ferms mos talans
		que de vos platz mai dezirs e l'enveya
	50	que d'autr' aver so per c'om la domneya.