Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Codi: 461,009a Autor: Anonyme Gènere: Canso Número: XIV

 

Aissi m'ave cum a l'enfan petit

I		Aissi m'ave cum a l'enfan petit,
		que dins l'espelh esgarda son vizatge,
		e·i tast'ades e tan l'a assalhit
		tro que l'espelhs [se] franh per son folatge,
	5	adonca·s pren a plorar son damnatge:
		tot enaissi m'avia enriquit
		us bels semblans, qu'er an de mi partit
		li lauzengier per lor fals vilanatge.
II		E per so ai conques gran consirier
	10	e per so tem perdre sa drudaria,
		et aisso·m fai chantar per dezirier;
		car la bela tan m'a vencut e·m lia
		que per mos olhs tem que perda la via
		com Narcisi, que dedins lo potz cler
	15	vi sa ombra e l'amet tot entier
		e per fol'amor mori d'aital guia.
III		Be fora de son perdo cobeitos,
		car l'an de mi fals lauzengier partida:
		Deus lor do mal, car ses los enojos
	20	agra gran gaug de leis e gran jauzida!
		Membre·us, bela, la douss'ora grazida
		que·m fetz baizar vostras belas faissos:
		aisso·m ten en esperansa joios
		que nostr'amors sia per be fenida.
IV	25	A la bela t'en iras, ma chansos,
		e digas li que sai [sui] de joi blos,
		si no·m reve qualsque bona jauzida.