Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 436,004=282,021a Autor: Simon Doria, Lanfranc Cigala Gènere: Tenso Número: LV

 

Segne'n Lafranc, car es sobresabenz

I	1	Segne'n Lafranc, car es sobresabenz,
		Vos clam merce qe mi fassatz secors;
		Una domn'am, en cui regna valors,
		Et ella mi, qar be·n sui conoissenz:
	5	En cui metrai, segon vostra scienza,
		Fina beutat, e voluntatz no·us venza,
		En leis cui am, o starai me·n ioios,
		Pos del donar m'a fait Dieus poderos?
II		Amics Symon, car ami finamenz,
	10	Conseil de grat totz los entendedors,
		E d'autra part no·us dei vedar acors,
		Car ieu vos am e vos sui benvolenz;
		Per q'ie·us coseill qe·il beutatz e·ll plazenza
		A la domna donetz; no i ha contenza,
	15	Qar si trop mais non l'amasses qe vos,
		Non creiria qe fosses amoros.
III		Segne'n Lafranc, lo vostr'esegnamenz
		Mi plagra ben, si no·m forces paors,
		Q'ieu ai dopta q'il no·s vires aillors
	20	E no·m cambges sos bels acuillimenz;
		Qe pos beutatz s'es mesclat'ab valenza,
		Ergoils en nais, qi dechai benvolenza,
		Per q'ieu la·m voil retener, q'aitals dos
		Mi fora grieu qe·m fezes doloiros.
IV	25	Si·us tolia per far plazers plazenz
		Vostra domna sos gaugz e sas honors,
		En avol luec s'es messa vostra amors,
		Amics Symon, e vostr'entendimenz;
		Per q'ie·us conort qe non aiatz temenza,
	30	Car pos il ha valor e conoissenza,
		Si·l ven per vos tan granz meillurazos,
		Pensatz qon er onratz lo gazardos.
V		Segne'n Lafranc, aqest razonamenz
		Qe·m razonatz m'es pantais e dolors;
	35	Ieu ai auzit q'a bos conortadors
		Non dol lo caps, per qu'ieu n'estauc temenz;
		Q'om non pot plus mas per bona creenza
		D'autrui saber son cor ni s'entendenza;
		Mas de mi sai per cert qe per nuls bos
	40	Meilluramenz non li for'oblidos.
VI		Amics Symon, ben par qe·us etz fegnenz,
		Qar non avetz lo cor dels amadors;
		Qe si·us coches amorosa sabors,
		No·us issira del bec motz recrezenz.
	45	Ai, qom dissetz tan granz desconoissenza,
		Qe pros domna fezes entrefaillenza?
		Aiqi mostratz qe n'es desamoros,
		Mas no·l sabra per me sos cors ioios.
VII		Segne'n Lafranc, franqez'e nuirimenz
	50	Esmeron tant midonz e sas lauzors
		Qe no·il sufragn ni beutatz ni colors
		Qe non a par de rics faitz avinenz;
		Per q'ieu puesc ben retenir ma parvenza
		. . . . . . . . . . . . . . . . . . . . . . . . . . . . . .
	55	S'ieu soi plazentz ni gais, qe a rescos
		Li serai ieu sivals plus saboros.
VIII		Amics Simon, be·m sembla dreigz nienz
		Vostre parlars et ergoills et errors,
		Q'anc de beutat non fon domna tan sors,
	60	Q'en leis regnes tota complidamenz,
		Estiers midonz, c'ades meillur'e genza,
		E si·l vostra fos d'aital captenenza,
		Hom far o ve a guiza de garzos,
		Qar eu non vei don mou la contenzos.
IX	65	Na Flors-de-lis, q'es razis e semenza
		De pretz entier, non vol qe sia tenza,
		Segne'n Lafranc, d'aizo entre nos dos,
		Anz mand'e vol q'aia fin la tenzos.
X		A dona tain beutatz e conoissenza
	70	Et ad home ardimentz e valenza;
		Quar per beutat non es hom cabalos,
		Q'amors non qer mas los valentz e·ls pros.