Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Codi: 389,034 Autor: Raimbaut d'Aurenga Gènere: Vers (de réponse) Número: VIIIa

 

Peire rotgier, a trassaillir

 

        

I	1	Peire rotgier, a trassaillir
		m’er per vos los digz e·ls covens
		q’eu aic a midonz, totz dolens,
		de chantar que·m cuidiei soffrir;
	5	e pois sai etz a mi vengutz,
		cantarai, si n’ai estat mutz,
		que non vuoill remaner confes.
II		Mout vos dei lauzar e grazir
		car anc vos venc cors ni talens
	10	de saber mos chaptenemens,
		e vuoill qe·n sapchatz alqes dir;
		e ia l’avers no·m si’escutz,
		s’ieu sui avols ni recresutz,
		qe pel ver non passetz ades.
III	15	Car qui per aver vol mentir,
		aqel lauzars es blasmamens
		e tortz e mals enseignamens,
		e fa·n als autres escarnir;
		q’en dich non es bos pretz saubutz,
	20	mas el faich es puois conogutz,
		e pelz faitz veno il dich apres.
IV		Per me voletz mon nom auzir,
		cals son, o drutz... Er clau las dens,
		c’ades poia mos pessamens,
	25	on plus de prion m’o conssir;
		ben vuoill sapchatz que non sui drutz
		tot per so car non sui volgutz,
		mas ben am, sol midonz m’ames.
V		Peire rotgier, cum puosc sofrir
	30	qez eu am aissi solamens?
		Meravill me si viv de vens;
		tortz es si·m fai midonz morir.
		S’ieu muor per liei farai vertutz,
		per qu’eu cre que, si fos perdutz,
	35	dreitz fora qe puois mi nogues.
VI		Era il ven en cor que m’azir,
		mas ia fo q’er’autres sos sens
		c’aitals, e ssos entendemens,
		per q’ieu li dei totz temps servir,
	40	pel ben qe·m n’es escazegutz;
		ja no m’en vengues mais salutz,
		li dei totztemps estar als pes.
VII		Si·m volgues sol tant cossentir
		q’ieu fos totztemps sos entendens,
	45	ab bels digz n’estera gauzens,
		e feira·m ses faitz esgauzir;
		e degra·m ben esser cregutz,
		q’eu non dic tant qe·m fos creguz
		mais del bon respieich don visques.
VIII	50	Bon Respieich, d’aut sui bas cazutz,
		e si no·m ereb sa vertutz,
		per conseil li don qe·m pendes.