Shepard, William Pierce. Two Derivitive Songs by Aimeric de Peguilhan. "Speculum",2.3 (1927), pp. 296-309

Codi: 010,025 Autor: Aimeric de Peguillan Gènere: Canso Número: I

 

En Amor trob alques en que·m refranh

                                                                                                                  

 

 

                                                                                                        

I	1	En Amor trob alques en que·m refranh,
		Qu’al menhs d’Amor mals o bes no·m sofranh,
		Ni ieu per mal no·m luenh d’Amor ni·m franh;
		On plus m’auci plus ves Amor m’afranh.
	5	Mas no conosc qu’Amors vas me s’afranha,
		Ni ieu non ai d’Amor poder que·m franha.
		Res no·m sofranh, sol qu’Amors no·m sofranha,
		Quar ses Amor no sai en que·m refranha.
II		D’Amor no·m puesc partir, qu’Amors mi pren,
	10	E quan m’en cug emblar plus mi repren
		Ab un esguart don mos cors s’escompren,
		Que·m fai venir de lieys en cuy m’enpren.
		Mas a son dan no·us cuidetz que m’enprenda,
		Ni per autra mos fis cors s’escomprenda,
	15	Don hom per fals amador mi reprenda,
		Qu’en lieys es tot, si·l platz, que·m lais o·m prenda.
III		Aissi suy faigz del tot al sieu co
		Que nulha re no·n desdic qu’elha·m man.
		Pero d’un be la prec que no·m desman
	20	Qu’al comensar me promes del deman;
		Don fai peccat hueymais quar no·m demanda
		E granz merces savals quar no·m desmanda;
		Mas ieu tenh be per desman si no·m manda:
		Pero assatz qui no·n desditz comanda.
IV	25	En lieys son tug li bon ayp qu’om retrai,
		Estiers que greu promet e leu retrai,
		Per qu’ieu no puesc sufrir lo mal qu’ieu trai
		Si qualque be Amors no m’en atrai.
		Mas pero be o mal qual qu’ieu n’atraya
	30	Sufrirai tot, que ja per mal qu’ieu traya
		No·m estrairai d’amar, qui que·s n’estraya,
		Ni ja nulh temps no vuelh qu’om m’o retraya.
V		Don’, en vos ai mon cor tan fin e ferm
		Que ges non ai poder qu’ieu l’en desferm.
	35	Abans vos jur sobre sanhs e·us aferm
		Cum plus m’en cug partir, plus mi referm;
		E si Merces que·ls partimens referma
		Per chauzimen en vos plus no s’aferma,
		Totz mos afars s’i destrui e·s desferma,
	40	Qu’autra del mon no vuelh que m’estia ferma.
VI		L’adregz Guilhems Malaspina referma
		Don e domnei, si que quasqus aferma
		Que de bon pretz no·s laissa ni·s desferma,
		Per qu’om en luy deu tener prova ferma.
VII	45	Na Biatritz d’Est, tant etz fin’e ferma
		Que·l vostre sens no·s camja ni·s desferma,
		Don vostre laus se melhur’ e s’aferma
		E pueys mos chans e mos digz o referma.