Aston, S. C.. Peirol. Troubadour of Auvergne. Cambridge: University Press, 1953

Codi: 366,010 Autor: Peirol Gènere: Tenso (partimen) Número: XXVIII

 

Dalfi, sabriatz me vos

I	1	Dalfi, sabriatz me vos
		mostrar razonablamen,
		quant ha pro dona valen
		drutz cortes e pros,
	5	cora s’eschai
		que l’am plus ab cor verai
		quan lo ha fait ho enan?
		Diguatz m’en vostre semblan.
II		Peirol, leu m’es lo respos,
	10	quar ben sai certanamen
		c’amistatz per jauzimen
		creis, et es razos,
		que maior jai
		ha drutz, pos sidonz ho fai;
	15	e·l grans jois, c’a ses engan,
		fai ades l’amor plus gran.
III		Dalfi, ben sai e conos’
		c’om, pos ama finamen,
		mor ades tro que·l joi pren,
	20	don plus es coitos.
		E pueis estai
		lo dezirs, c’oltra no vai,
		non cre de negun aman
		que pueis am’ ab fin talan.
IV	25	Peirol, aiso metetz jos,
		c’aprop l’afaire plazen
		trob’ om fin aman soven
		mout plus volontos;
		c’amors atrai
	30	aprop lo joi grant esmai,
		e membre vos de Tristan
		c’ab Yzeut morit aman.
V		Dalfi, vers es que·ill poizos
		que lor det beure Braiguen
	35	la nueit per descauzimen
		lo fes angoissos;
		mas de mi sai
		c’ochaizonatz en serai
		e ben leu aurai hi dan
	40	quar mantenh ma razo tan.
VI		Peirol, remanha·ill tensos,
		car vos o faitz ben parven
		c’anatz falsedat cubren.
		Datz vos ocaizos;
	45	ja no creirai
		que drutz cortes no am mai
		sidonz, pos no vai gardan
		vas leis de ren qu·il deman.
VII		Dalfi, no sai,
	50	mas bon conseill vos darai,
		que si ben no l’ama tan
		sivals fassa·n lo semblan.
VIII		Peirol, ben sai,
		e tant conogut vos ai,
	55	que·ls leials anatz jutgan
		segon vostre cor truan.