Stimming, Albert. Der Troubadour Jaufre Rudel, sein Leben und seine Werke. Berlin: August Hettler, 1873

Codi: 262,003 Autor: Jaufre Rudel de Blaja Gènere: Canso Número: VI

 

No sap chantar, qui so no di

I	1	No sap chantar, qu so no di,
		ni vers trobar, qui motz no fa,
		ni conois de rima cos va,
		si razo non enten en si ;
	5	mas lo mieus chans comens aisi,
		con plus l’auziretz, mais valra a a.
II		Nulhs hom nos meravilh de mi,
		s’ieu am so que no veirai ja,
		qu’el cor joi d’autr’ amor non a
	10	mas d’aissella, que anc non vi ;
		anc nom dis ver ni nom menti,
		ni no sai, si ja so fara a a.
III		Colp de joi me fer, quem ausi,
		e ponha d’amor, quem sostra
	15	la carn, don lo cors magrira ;
		et anc mais tan greu nom feri,
		ni per nulh colp tan non langui ;
		quar no cove ni no s’esca a a.
IV		Anc tan suau nom adurmi,
	20	mos esperitz tost no fos la,
		ni tan d’ira non ac de sa,
		mos cors ades no fos aqui ;
		mais, quan mi reissit lo mati,
		totz mos bos sabers mi desva a a.
V	25	Ben sai c’anc de leis nom jauzi,
		ni ja de mi nos jauzira
		ni per son amic nom tenra
		ni coven nom fara de si ;
		ni per nulh joi aitan no ri,
	30	e no sai quals bes m’en venra a a.
VI		Un’ amor lonhdana m’auci,
		el dous dezirs propdas m’esta,
		e quan m’albir, qu’ieu m’en an la
		en forma d’un bon pellegri,
	35	mei voler son siei anc issi
		de ma mort qu’estiers non sera a a.
VII		Peironet, passa riu d’Ili,
		que mos cors a lieis passara,
		e si li platz, alberguar m’a,
	40	per quel parlamens sera fi ;
		mal me faderon mei pairi,
		s’amors m’auci per lieis que m’a a a.
VIII		Bos es lo vers, can noi falhi,
		e tot so quei es, ben esta ;
	45	e sel que de mi l’apenra
		gart se, noi falha nil pessi ;
		car si l’auzon en Caerci
		en Bertrans el coms en Tolza a a.
IX		Bos es lo vers, e faran hi
	50	calque re, don hom chantara a a.