Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Testimonis
* Aparat crític

 

Stimming, Albert. Der Troubadour Jaufre Rudel, sein Leben und seine Werke. Berlin: August Hettler, 1873

Codi: 190,001 Autor: Grimoart Gausmar Gènere: Canso Número: [VII]

 

Lanquan lo temps renovelha

I 1
Lanquan lo temps renovelha
    e par la flors albespina,
    ai talant d’un chant novelh,
    e son florit l’albespi
  5 [qu’ieu sai cum lo chans refri]
    doussament per miei la bruelha,
    lo rossinhols s’esbaudeja.
     
II  
E quan lo boscs reverdeja
    nais fresca e vertz la fuelha,
  10 adoncas ieu reverdei
    de joi e florisc cum suelh,
    ab lo dous chan del mati,
    que fan d’amor li auzelh,
    jauzens somon al aurelha.
     
III 15
E pus l’us l’autre s’enselha,
    el par ves sa par s’aizina,
    de nos es dregz, que s’enselh
    quascus d’atretal aizi
    ab fin’ amor ses erguelh,
  20 qu’ieu conosc assatz e vey,
    pus la malvestatz s’orguelha
    qu’amors non deu far enveja.
     
IV  
Jois ab amar cabaleja, 
    es veston d’una despuelha,
  25 e cui que desabalei,
    d’escassedat mi despuelh ;
    amors si senh ab joi fi,
    e jois fa d’amor capdelh,
    e malvestatz, que no fina,
  30 baissa pretz el descapdelha.
     
V  
Cortezament assembelha
    amors vera e s’afina,
    que de joi fa son sembelh,
    per qu’ieu plus ves lieis acli,
  35 e malvestatz dezacuelh
    pretz, que no sap on s’estei,
    per qu’ieu laus, jovens acuelha
    amor et ab lieis esteja.
     
VI  
Aissi voluda e guerreja
  40 mai lo ben, que dieus lur tuelha,
    als avars, qui ieu guerrei,
    mais no val re so quels tuelh,
    ans porta jovens tapi
    s’amors noi fai son apelh
  45 tota joja s’atapina
    c’uns no vol pretz ni l’apelha.
     
VII  
Res el mon non es plus belha
    d’amor veraja vezina,
    ni re non tenc mai per belh
  50 nim vol aver a vezi
    ves nulha part on reduelh,
    qu’ieu puesca trobar mersei,
   
rics malvatz gara e rodelha,
    et amors ri e merseja.
     
VIII 55
Sobrels melhors senhoreja
    mos chans, en qual guizam vuelha,
    els motz laissans senhorei
    els sai dir aissi cum vuelh ;
    e vec vos del vers la fi,
  60 qu’en Grimoartz vos espelh,
    qu’ab joi lo las e l’afina,
    sis qui bel chant nil espelha.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI