Jeanroy, A.. Poésies provençales inédites d'après les manuscrits de Paris. "Annales du Midi", 17 (1905), pp. 457-489

Codi: 293,034 Autor: Marcabru Gènere: Vers Número: XI

 

Hueymais dey esser alegrans

I	1	Hueymais dey esser alegrans
		Pus laura doussa uey uenir
		Et auch lays e uoutas e chans
		Dels auzelhs quem fan esbaudir
	5	Lo gen temps me fai alegrar
		Mes per iouen me desconort
		Quar totz iorns lo uey sordeyar.
II		Duna ren suy merauelhans
		Quades uey granar e florir
	10	Escassetatz oc et enians
		Uas qualque part me torn nimuir
		Cortezia ni ben estar
		Ni pretz ni ualor ni deport
		Uas nulha part no uey renhar.
III	15	Estz lauzengiers lenguas trencans
		Cuy dieus cofonda et azir
		Meton proeza en balans
		E fan maluestat enantir
		Mas als pros dic e uuelh preyar
	20	Que ia us ab elhs nos nacort
		Si en proeza uol renhar.
IV		Eyssamens son domnas trichans
		E sabon trichar e mentir
		Per que fan los autrus enfans
	25	Als maritz tener e noyrir
		Daqui nayssol malvat cuiar
		Qus non ama ioy ni deport
		Nin auza hom entrelhs parlar.
V		Ja dieus nol sia perdonans
	30	Qui las uol onrar ni servir
		Estas putas ardens cremans
		Peiors que ieu nous saubra dir
		Tan lor sap bo lo clau copar
		Que non hi guardon dreg ni tort
	35	Mas selh que mielhs las sap ronsar.
VI		Qui anc fon prezats ni amans
		Per dompnas ben sen deu gequir
		Quaytan sen aura us truans
		Omais si mais li pot bastir
	40	Et ieu poirio ben proar
		Per mi dons na cropasort
		Mas ia no la vuelh decelar
VII		Mesatg... cortes be parlans
		Vai ten en urgel ses falhir
	45	E sias del uers despleyans
		An cabrieira quelo remir
		E potz li dir senes gabar
		Quen tal loc ai tornat ma sort
		On elh poiria pro muzar.