Appel, Carl. Poésies provençales inédites tirées des manuscrits d’Italie. "Revue des langues romanes", 34 (1890), pp. 5-35

Codi: 231,002 Autor: Guillem Rainol d'At Gènere: Sirventes Número: [XV]

 

Laissatz m'era de chantar

I	1	Laissatz m'era de chantar
		mas per esqivar los danz
		qe prenia iois e chanz,
		m'er per eus pas a tornar.
	5	e no·m chal s'entrels maritz
		non es mos chanz achoillitz,
		tan gen s'acord' ab los gais;
		mas trop n'i trob de savais
		abrigatz sotz bel parer,
	10	quais qez ill cuion saber
		de prez corn vai ni don mou,
		ez uns no tastec del brou.
II		Malvestat vei trop poiar
		e prez decazer a panz,
	15	e per colpa dels truanz
		vei tot lo segle torbar,
		qe·l bocs es al lop arditz
		e l'austor sec la perdiz,
		l'agnels garda e·l pastre pais,
	20	e·l muls cavalca son fais,
		e vei lo frevol tener
		e·l fort bruzar e cazer
		e·l carre denan lo bou
		e nadal segrent an nou.
III	25	Si·m qers ni·m vols demandar
		don es traitz aquest semblanz:
		dels rics, qar per lor enganz
		los vol deus tant abaissar
		q'us frevols pobols petitz,
	30	armatz de sobrepelitz,
		q'anc mais az enan no·s trais,
		lor tolon tors e palais,
		e·s fan contr'els tan temer
		qe contra lor fals poder
	35	han bastit un segle nou,
		e no son mas oitz o nou.