Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Codi: 345,002 Autor: Peire Guillem de Toloza Gènere: Sirventes Número: [II]

 

Eu chantera de gauz e voluntos

I	1	Eu chantera de gauz e voluntos
		un sirventes, qui per dreit lo·m grazis,
		car hom, si· m voill, meillz de mi non chaucis
		d'aqels q'eu vei qals es avols e bos;
	5	per qe n'ai malvolenz
		toz los flacs recrezenz,
		car lor voill vertat retraire,
		mas eu non puos far ren als,
		qar ma razos es aitals.
II	10	E pos aitals conois q'es ma razos,
		als pros serai bendisenz et aclis
		et als malvaz serai, q'aisi·s partis,
		braus et esqius e mals et orgoillos;
		qar ab deschauzimenz
	15	venz hom las avols genz,
		et ab ben, qui o sap faire,
		venz hom los pros e·ls leials,
		per qu'eu serai bos e mals.
III		Trop m'enoia d'avol home ricos,
	20	que grant honor ni grant terra baillis
		e cuida aunir sos pros paubres vezis
		senes donar e senes messios,
		e cuida esser valenz
		per faire bastimenz,
	25	et es parlers e gabaire.
		aqels plus qe deners fals
		non deu esser prez cabals.
IV		No·m plaz rics hom, si non es amoros,
		ni·m plaz dompna, si gent non acuillis,
	30	ni·m plaz doncels, si de gauz non servis,
		ni doncela, si non a bel respos,
		ni·m plaz escars manenz
		ni ioglars desplazenz,
		ni·m plaz hom trop menazaire,
	35	ni·m plaz q'om en toz logals
		demostre qi er ni qals.
V		Car eu ai vist en corz mantas sazos
		maint bon solaz perdre per avol ris
		e mainz bos moz que, si fos qi·ls auzis
	40	ni·ls entendes, qe for' honors e pros;
		per q’es aitals mos senz
		c'ab los desconoissenz
		non aia compaigna gaire,
		qar ia non seria sals;
	45	e lais m'en e parlem d'als.
VI		Als valenz sui ses cor vaire
		e als pros amics corals
		e vas fin'amor leials.
VII		Deus sal l'adreit barataire,
	50	Girbert, q'es flors e seignals
		de toz bos faiz naturals.