De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 156,006 Autor: Folquet de Romans Gènere: Sirventes Número: LXXI

 

Far vuelh un nou sirventes

I	1	Far vuelh un nou sirventes
		Que razon n’ai granda,
		E dirai de Pretz on es,
		S’om tot nol demanda:
	5	Pretz sojorn’ ab los cortes
		E noi quier liuranda
		Mas joi e valor,
		E ten celui per senhor
		Quil da tal vianda.
II	10	Pretz vol ome conoissen
		Ab fina largueza,
		Franc e umil e plazen
		E ses avoleza;
		A celui se don’es ren
	15	Ei a s’amor meza;
		Mas pauc n’a conques,
		Qu’en cen baros non a tres
		Complitz de proeza.
III		Jamais negus mos amics
	20	No vuelh rics devenha,
		Pos mos senher Frederics,
		Que sobre totz renha,
		Era larcs ans que fos rics;
		Er li platz que tenha
	25	La terr’e l’aver;
		Aisso m’en comta per ver
		Cascus qui qu’en venha.
IV		Mas d’una re sia cert
		Qu’als savis aug dire:
	30	Qui tot vol tener tot pert;
		En aiso se mire
		E tenha donar ubert,
		Quel roda nos vire
		So desus desotz,
	35	Qu’al virar faria totz
		Sos enemics rire.
V		Et am Dieu que sus l’a mes
		E l’a dat corona,
		E son cosin lo Marques,
	40	Que cascus razona
		Que venir lin deu grans bes;
		Eil razos es bona;
		Qu’ieu vi, sous autrei,
		L’amor que cel d’Est li fei
	45	El coms de Verona
VI		Per qu’eu li vuelh cosselhar,
		Car l’am ses bauzia,
		Que sos amics tenga car
		E rics tota via,
	50	Que ben a poder de far
		Miel c’om qu’el mon sia
		Fatz d’ome valen;
		Vecvos doble falhimen,
		Si non o fazia.
VII	55	Emperair’, ieus vuelh prejar
		Que ja mal nous sia
		Seus dic mon talen:
		Que, car vos am coralmen,
		Vos mostr’aital via.
VIII	60	N’Otz del Carret, beus tenc car,
		Car en Lombardia
		No sai plus valen,
		Ni negus no m’en desmen
		De ben qu’eu en dia.