De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 205,007 Autor: Guillem Augier Novella Gènere: Sirventes Número: CXIV

 

Toz temps serai sirvenz per deservir

I	1	Toz temps serai sirvenz per deservir,
		En serventes, als flacs rics, d’aver sers,
		Quar de lor vei conseilliers e convers
		Conseilladors que fan aunor aunir;
	5	Per qu’en lor corz, cortas d’enseignamen,
		Non a sol sen ni cab hom enseignaz
		Neis eu mezeis, que no sui trop apres
		Ni trop prezaz; quan m’i pren, mi tenc pres.
II		Mas vianar volgra de Vianes,
	10	Qu’anc piez non fo viananz aviaz
		Qu’eu fui, quan vinc ves mos parenz paraz;
		Pero baros cortz, escorzaz cortes,
		Ai trobat mainz, on non val ren trobars;
		Tan son valen — que val? — tant m’an valgut
	15	Qu’anc piez no fo ros a Roma romieus;
		Quem son del meu desamaz entrels mieus.
III		Sapchan, sem des lo rics donaire Dieus
		Poder, li ric despoderat perdut
		Qu’eu son aitals, s’ieu quezes lor ajut,
	20	Com fon Judas quel vendet als Juzeus;
		Lor frech frach fag m’an lag desafaitat
		E desolat de solatz e de chan;
		Lor arrier son orrier de jai,
		Vil, de vilan, charau escaravai.
IV	25	A! Quan mal viu qui ve so queill desplai:
		Quel desplazer sai ve queill croi ric fan!
		Qu’eu n’ai vist mainz cui pretz trai de soan,
		Que soanan puois prez, quan ben lor vai;
		Qu’eu vi jal ric rei Rogier Frederic,
	30	Fresc, ses esfrei per valer a valor:
		Ja non cugei, tan l’auzi prez prezar,
		Que jal pogues Emperis pejurar.
V		E Monferat se solon referar
		Li desferat valen al valedor;
	35	Per so no i a desenseignat seignor,
		Si tot non fai loing sa valor volar;
		Mas eu com fols volei a mon voler
		En Vianes, on par dolors donars,
		On fols destrics m’a trebaillat tres ans
	40	Qu’anc plus estraing trebaill non trais truans.
VI		A ’N Raimon rest Berenguier prez prezanz,
		Cui non par dars dolors ni redars danz.
VII		Per son pais dels adreiz trespassanz
		Es Guiguo Guiz mos amics Alamanz.