De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 371,001 Autor: Perseval Doria Gènere: Sirventes Número: CL

 

Felon cor ai et enic

I	1	Felon cor ai et enic,
		Car vei tric
		Pojar, e prez perdre abric,
		Si qe a pauc de joi nom gic;
	5	Mas, per dar mal e genzic
		A cui non platz s’ai joi ric
		Cantarai; e mala vic
		Qui no vol guerra e destric,
		Per c’om conois ferm amic!
II	10	Pero bem platz qel temps francs
		Fai los brancs
		Dels arbres vermeils e blancs;
		E am guerra qils estancs
		D’aver fan remaner mancs;
	15	Em plaz can vei sobrels bancs
		Aur et argen co fos fancs,
		Per dar als pros ses cors rancs
		C’amon suffrir colps els flancs.
III		E am can vei l’estandart
	20	A sa part,
		Eil pros cavalier gaiart
		Gardon c’us no s’en depart;
		Eil vil recrezen coart
		Van qeren enjein e art
	25	De fugir, e an regart
		Can volon lanzas e dart,
		E la terra ’nviron art.
IV		Trompas, tanbor e sonaill,
		Cant hom saill
	30	Als castels, pres del muraill,
		M’agradon, e per terraill
		Venon peiras c’us no faill;
		. . . . . . . . . . . . . . . . . . . . . .
		Eil pic son vengut eil maill
	35	Ab qeil pros, loin de nuaill,
		Rompon portas ab trebaill.
V		Mas Engles si van vanan
		Q’ill venran
		E l’Emperi enqerran;
	40	En Espagn’a pro d’afan,
		Qeil Serrazi noil rendran,
		Per lur, Granada ugan;
		Qeil rei non fan nul deman,
		Anz prendon mescap e dan,
	45	De q’om los va fort blasman.
VI		Pero Pretz fora perdutz;
		Mas vertutz
		Fai nostre Reis, q’encar lutz,
		Manfrei, q’es de fin pretz lutz;
	50	Qe anc no fon recrezutz
		De donar ni esperdutz
		Per guerra; anz a vencutz
		Sos guerriers et abatutz
		E sos amics aut cregutz.
VII	55	Et en Miels-d’amor m’aferm
		Ab cor ferm
		De pretz; per qu’eu nom desferm
		D’amar leis, anz m’en referm;
		E, car non a cor enferm,
	60	Creis en joi e d’esmai merm.
		. . . . . . . . . . . . . . . . . . . . . . . .
		. . . . . . . . . . . . . . . . . . . . . . . .
		. . . . . . . . . . . . . . . . . . . . . . . .
VIII		Domna, Deu prec qeus referm
	65	Vostre fin pretz, eus aferm
		La gran beutat el cor ferm
		C’avetz vas me qe nos merm.
IX		Reis Matfrei, Pretz vos ten ferm
		E Deus en a fag conferm.