De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 282,022 Autor: Lanfranc Cigala Gènere: Sirventes Número: CLIII

 

Segni’En Thomas, tan mi plai 

I	1	Segni’En Thomas, tan mi plai
		Lo pretz c’om de vos retrai,
		Eill honrat fag qe vos faitz lai
		Vos mi fan tan plazer de sai,
	5	Qe tot zo q’ieu puesc ni q’ieu sai
		Vos profer et ancara mai,
		Qe pauc mi sembla zo qu’eu ai
		Ad honrar vos si com s’eschai;
		Per qu’eu d’aillors m’en propcerai.
II	10	E temeria faillir,
		S’ieu m’enardis de querir
		Qem voillatz per amic tenir;
		Mas, car de tot mon cor dezir
		Vostres precs per comanz auzir
	15	E vos honrar e obezir,
		Aisso m’en fai tot enardir;
		Q’om pot ben demandar e dir
		Lai on hom al cor de servir.
III		E certanament vos dic
	20	Qe ja nom trobaretz tric
		Ni fals ni felon ni enic,
		Anz mi trobaretz de cor ric,
		Qui qe l’aja croi ni mendic;
		Et auriam per enemic
	25	Quius fezes enoi ni destric,
		Nim creiria d’aisso chastic;
		Q’aissi deu hom amar amic.
IV		E, pos sui asseguratz
		A demandar zo qem platz,
	30	Prec que coblejan respondatz
		Ad aquestas coblas qu’eu fatz,
		Per fermar nostras amistatz;
		Mas eu non qier ges qem digatz
		Sius es gais ni enamoratz,
	35	Q’aisso sai eu ben q’es vertatz,
		Qu’estiers non foratz tan prezatz.
V		Pero, sius ven a plazer,
		Del vostre noble saber
		Voil per vos auzir e saber,
	40	Qar molt en poirai mais valer;
		Mas trop plus voluntiers vezer
		Vos bolgr’ieu, zo sapchatz en ver;
		Mas quecs deu laissar remaner
		Zo qe vol, cant nol pot aver,
	45	Tro qe n’aj’autra lezer.
VI		En Thomas, Cel quius fai valer
		Vos don complir vostre plazer
		E a mi don sen e poder
		D’onrar vos, qei ai lo voler.