De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 102,002 Autor: Bonifaci de Castellana Gènere: Sirventes Número: CLV

 

Guerr’e trebalhs e bregam platz

I	1	Guerr’e trebalhs e bregam platz:
		Em platz quan vei reiregarda,
		Em platz quan vei cavals armatz,
		Em platz quan vei grans colps ferir;
	5	Qu’aissim par la terr’estorta;
		Qu’aitals es mos cors e mos sens;
		E de plag sai quascun jorn mens.
II		Cil d’Ast prendon tregas e patz,
		E perdon, tro a Stafarda,
	10	Tota la terra qu’es de latz;
		Qu’enaissis o ai auzit dir:
		Que Cunis era lor porta;
		Et ar vei que lor es nozens
		E no fai pas lors mandamens.
III	15	Lo dans dels Proensals mi platz,
		E quar degus nos pren garda
		Els Frances son tan ensenhatz
		Que quascun jorn los fan venir
		Liatz ab una redorta,
	20	E no lor val nul cauzimens:
		Tan los tenon per recrezens.
IV		Mout m’enoja dels avocatz
		Quels vei anar ab gran arda,
		E pesam conseil de prelatz;
	25	Qu’anc nul home no vi jauzir:
		Ans, qui son dreg lor aporta,
		Els dison: «Aisso es niens:
		Tot es del Comte veramens».
V		Los Genoes vei trop mermatz
	30	El Capitani quels garda:
		E de Ventamilal Comtatz
		Perdon, que solian tenir;
		Donc bem par Genoa morta:
		La Poestatz n’es noncalens
	35	Que lur sol esser defendens.
VI		Enans penria l’esporta
		Qu’ieu no li defenda; mas gens
		Am cavaliers et am sirvens.
VII		Mauri, us jois me conorta:
	40	Qu’ieu sai be que la plus valens
		Me vol mais que totz sos parens.