Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,002 Autor: Gaucelm Faidit Gènere: Canso Número: 14

 

Ab cossirier plaing

I	1	Ab cossirier plaing
		en chantan mon dampnatge
		d’un joi qe-m sofraing
		per mo meteis follatge,
	5	q’en pays estraing
		sui, e non vei messatge
		de lieis, cui soplei,
		don jes no-m recrei !
		c’ades on q’estei
	10	l’aclin, ses cor volatge,
		si tot no la vei.
II		Mout fis bel gazaing
		qan pres mon homenatge,
		per q’ieu non remaing
	15	en autrui seignoratge ;
		ni a mi no-is taing
		q’ieu seg’ autre viatge,
		ni que la desrei
		en autrui dompnei ;
	20	anz sos sers m’autrei,
		humils, ab fin coratge,
		c’autra non envei.
III		Midons sui aclis
		vas on q’ieu an ni veigna ;
	25	et al doutz pays
		on ill estai e reigna
		soavet m’aucis
		ab sa falsa entresseigna ;
		e non sai perque
	30	m’a destreich ancse,
		q’ieu l’asegur be
		que ja d’autra no-m feigna ;
		mas ill no m’en cre.
IV		Mieills fora-m sofris
	35	de lieis, cui jois manteigna,
		qu’ieu ja no la vis,
		c’aitals maltraitz m’en veigna ;
		sola m’a conquis
		la bella, que no-m deigna,
	40	tro per sa merce
		mi retenc ab se ;
		ar, no l’en sove,
		car m’es ops qe-m reveigna
		ni-l membra de me.
V	45	Amors, que farai,
		s’aisi-m desasegura
		lo mals q’ieu en trai,
		e de mi non a cura ?
		car jelos savai
	50	et avols gens tafura
		e croi lausengier
		son d’amor guerrier ;
		per q’a Jhesu quier
		que los met’ en rancura
	55	et en encombrier !
VI		Joios, ben s’eschai
		c’aia de joi fraitura
		qi ab joi estai
		et ab joi no s’atura ?
	60	e mos cors es sai
		loing de bon’aventura,
		en greu cossirier ;
		e mon Santongier
		vei d’amor primier,
	65	e si sa joia-il dura,
		be-ill vai a sobrier !
VII		E tu, messatgier,
		porta-l chan leugier
		N’Agot, on pretz s’atura,
	70	lai part Monpeslier
VIII		Linhaure, mestier
		m’agra-l bona ventura
		que-m venc de premier.