Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,010 Autor: Gaucelm Faidit Gènere: Canso Número: 21

 

Ar es lo montç vermellç et vertç

I	1	Ar es lo montç vermellç et vertç
		e de mantas colors cubertç,
		e rema-l brun’ aura negra,
		e l’ausel desseron lur becs ;
	5	per c’ieu ai talent che desplec
		tal un vers ce far no pogra
		mentre ce-l desturbiers me tenc.
II		Mas era m’esmend’ e m’endertç
		los maltraitç c’avia sufertç,
	10	non gies cill ce far o degra,
		mas autra, ce-m trais fors los decs
		can vic lo gran affan qui-m crec,
		don giamais mos cors no-s mogra
		si-l fins giois no fos, ce-m revenc…
III	15	… de midons, qi m’a si aut dertç,
		per c’ieu puosc e dei esser certç
		qu’ill a me no s’eschasegra
		mais, pos que-l platç — eu no ssoi pecs ! —
		c’a sson plaser ab lieis m’aplec —
	20	e l’autra, c’ades mi nogra,
		torne s’en ab aquo qe venc !
IV		Ab son engan, qui-s vair e vertç
		et ab sos bels ditç fals, cubertç,
		s’en torn’ et ab s’amor negra,
	25	c’a doas lengas e dus becs,
		mas lieis non cal, qui-s qu’en desplec,
		lo ver del mal qu’ieu dir en pogra,
		si-m volgues, pel dan en que-m tenc.
V		No-s tainh, que-l bela m’o endertç,
	30	e ssi tot eu ai lai sufertç
		los dantç que sufrir non degra,
		tuogll m’en, e met’ ab leis mos decs,
		cui grazisc, car mi det e-m crec,
		che gia per autra no mogra
	35	mos cors, del mal c’a me revenc.
VI		Per so, dic c’a bona fe-m dertç
		ma dompna, e ssoi ne ben certç —
		mais dic, ce no m’escasegra,
		neus q’eu en pens, e ssoi ben pecs !
	40	— Per qe ? — Car dic e’am lieis m’aplec —
		— Mi trac doncs ? — Oc— Nonca-m nogra
		ver dir del fi gioi que me venc.
VII		— Si fera, que-l giois es trop vertç,
		e gia-l dirs no-n fura sufertç
	45	per lieis, e non s’escasegra,
		que d’uns n’i a, ab trenchans becs,
		tals c’anc giois ab lur vol non crec !
		ans si pogues, cacs mi nogra
		ab lieis de cui mi meteis tenc.
VIII	50	D’on deport, lieis mon vers desplec,
		denant N’Agout, de cui mogra
		si-l giois non fos ce sai mi venc.