Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,012 Autor: Gaucelm Faidit Gènere: Canso Número: 33

 

Be-m platz e m’es gen

I	1	Be-m platz e m’es gen
		d’amic q’en joi s’aten,
		q’a fin cor, clar, valen !
		cal que hon mestier aia,
	5	fassa lui parven
		sa bon’ obr’ e son sen ;
		sol que en be s’eschaia
		bes e gaugz l’en ve…
		Per qe-is taing e-is cove
	10	c’una chansson retraia,
		conhd’ ab digz prezatz,
		car mout sui gen prejatz
		que chant e m’assolatz !
II		E car plus soven
	15	non chant, fatz faillimen,
		que tals mi ten jauzen
		e m’alegr’ e m’apaia ;
		don dic, q’ieu no-i men,
		q’al mieu conoissemen,
	20	el mon non es tant gaia ;
		per qu’en sa merce
		mi sui mes, per jasse
		ab cor que no-m n’estraia,
		e rendutz e datz ;
	25	e, s’ieu ren dic ni fatz,
		de ben, sieus sia-l gratz !
III		Per aital coven
		li fis de mi prezen,
		car mi det, doussamen
	30	baisan, s’amor veraya,
		e-m dis en rizen :
		« Amics, mon cors vos ren,
		e faitz-en so que-us plaia… »
		e, quan m’en sove
	35	de l’onor e del be,
		jes mos cors no s’esmaia
		ni estai iratz,
		c’ab bels plazers honratz
		mi reten s’amistatz…
IV	40	Jes no m’espaven
		ni-m recre de joven
		per fals bruit d’avol gen
		cui proesa esglaia ;
		e, car chascus sen
	45	son cor flac recrezen,
		cujon qe-l mons dechaia,
		e no-n semblon me,
		q’ieu sai e cug e cre
		qe-l segles, qui q’en braia,
	50	ni-n critz ni-n menatz,
		es bos als pros prezatz
		et avols als malvatz !
V		Doncs, pus be m’en pren,
		merce-l clam humilmen
	55	— c’om no-s fassa cresen
		que ja per re s’escaia
		que en mon viven
		mon cor ni mon talen
		del sieu ric poder traia ! —
	60	c’Amors m’a ab se
		e mon Bon Esper te,
		mal grat de gen savaia,
		si c’a d’autre latz
		no m’abelis ni-m platz
	65	q’ieu vir mas volontatz !
VI		Sieus sui, ses conten,
		qu’autra no li-m defen —
		E tu, chanssos, vai t’en,
		e, per ren qu’om t’atraia,
	70	no-t tarzes nien
		tro mon Plus Avinen,
		neis qui-t donava Blaia !
		e, car ieu-m malme
		de lieis vezer, per re,
	75	prec li, qu’en dan no-m chaia,
		que mi sui lassatz
		ab tal on es beutatz,
		pretz e humilitatz.