Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,044=449,002 Autor: Gaucelm Faidit, Uc de la Bachallaria Gènere: Partimen Número: 45

 

N’Uc de la Bachallaria

I	1	N’Uc de la Bachallaria,
		conseillatz m’al vostre sen ;
		Una dompn’ am finamen
		qe ditz que no m’amaria,
	5	c’amic a, don no-is partria —
		si non per aital coven :
		que lui ames a presen,
		e qu’il agues seignoria
		en mi tot celadamen ;
	10	e s’ieu aisso li sofria,
		enaissi m’en gauziria,
II		Gaucelm Faidit, ses fadia,
		vos don conseill d’avinen,
		qe prendatz so qe-us cossen —
	15	e, s’il plus vos cossentia,
		(c’ab soffrir venz hom tot dia,
		e-n son maint paubre manen,
		pois no-is fadia qui pren)
		q’ieu dic que tota es mia
	20	qan d’amor mi fait parven,
		e, s’ieu ren als i vezia,
		fols sui si o conoissia !
III		N’Ugo, senes drudaria
		e ses penre gauzimen
	25	vuoill mais estar, per un cen,
		qe soffrir aital follia,
		c’autre drutz teng’ en baillia
		midonz q’ieu am finamen !
		Del marit nonca m’es gen ;
	30	gardatz, si d’autr’ om sabia,
		q’en seria, q’ieu enten,
		q’ieu morris de gelosia —
		e piejer mortz non cuich sia.
IV		Gaucelm, s’ieu de dompn’ avia,
	35	bella, cortes’ e plazen,
		a rescost tot mon talen
		ben vuoil morir, q’ieu morria !
		q’ieu dic que mil tans valria
		qe si no-i agues nien ;
	40	— en aisso non a conten —
		ni, pero, s’esser podia
		c’a celat la vis soven,
		tans de plazers li faria
		q’ieu sai qe-l plus conqerria !
V	45	N’Ugo, ges eu non creiria
		qe-il plazer fosson plazen,
		anz auria espaven
		si tot al drut lo tolia ;
		o s’enaissi-s remania,
	50	cals qu’en fos, ab cor suffren,
		c’atretal galiamen
		fezes per sa leujaria
		per q’ieu mezeis li-m deffen —
		sol m’aura e sals m’en tria —
	55	lieis lais e sa compaignia !
VI		Gaucelm Faidit, pauc embria
		drutz, c’aissi leugieiramen
		se part de sidonz breumen —
		e no-m par ges cortesia —
	60	sabetz qe-us conseillaria ?
		qe l’amassetz eissamen
		cum il vos, jogan rizen,
		e qe acsetz autr’ amia
		don chantassetz leialmen ;
	65	e lieis tencsetz tota via
		aissi cum ill vos tenria !
VII		N’Ugo, a pauc non consen
		que dreitz e razos seria —
		ab qe fassa-l jutjamen
	70	a Ventadorn Na Maria,
		on es pretz e cortesia.
VIII		Gaucelm, lieis teing per valen,
		e vuoill qe-l fassa, ab qe-i sia
		apres lieis, tot eissamen,
	75	lo Dalfins, qe sap la via
		et l’obra de cortesia.