Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,068 Autor: Gaucelm Faidit Gènere: Canso Número: 52

 

Tant sui ferms e fis vas Amor

I	1	Tant sui ferms e fis vas Amor
		que ja, per mal q’ie-n sapch’ aver,
		no-n partrai lo cor ni-l saber,
		qe-l ben e-l mal teing ad honor ;
	5	car tuich li miei afar major
		son en celar et en temer
		vos, dompna, don no-m tuelh ni-m vire ;
		ans vos am, e-us vuoill, e-us esper ;
		et on mais am, plus fort sospire,
	10	e plus muor qan no-us puosc vezer.
II		Dompna, greu puosc vius remaner,
		car no-us vei gaire ni vos me,
		e qui so que ama non ve
		non pot de pejor mal jazer —
	15	Pero, molt soven, m’alezer
		en un bel plazer qe-m reve,
		c’ab los huoills del cor vos remire,
		qar aqels non part ni-n refre,
		ans sui de mos bels ditz servire
	20	ab bon cor et ab leial fe.
III		Tant vos am c’autra no-m rete,
		anz sui per vos en tal error
		cum aquel q’a mal de calor,
		don setz no-is pot partir, per re ;
	25	(et on plus beu, plus a ab se
		voluntat de beur’ e d’ardor —
		Atressi, on plus ieu cossire
		de vos, ades n’ai cor meillor,
		et on mais n’ai, mais en desire,
	30	e mieills m’a-l jois de vos sabor.
IV		E pois tant leial amador
		m’avetz, bella dompna, en ver,
		plass’ a vos qe-m dej’ eschazer
		q’afranquetz tant vostra ricor
	35	qe non sofratz mais prejador
		mas mi, cui faitz viur’ e valer —
		Viure-m faitz, e fazetz m’aucire
		ad Amor qe m’a en poder !
		mas de tot sui leials sofrire,
	40	e ve-us me al vostre plazer.
V		Ai ! cum fui d’afortit voler
		qan me mis en vostra merce !
		que n’aja mal o n’aja be,
		res no-m pot del maltraich mover :
	45	qe-l mals m’auci e-m fai doler ;
		e-l bes, qan l’ai, ni jois m’en ve,
		si be-m plai plus q’ieu no-is sai dire :
		pois, aqui mezeis, m’esdeve
		que torn en aquel eis martire,
	50	car totz temps aquel iois no-m te.
VI		Hueimais vir mon chant, e-s cove,
		vas l’afar de Nostre Seinhor
		don tuich avem gran desonor,
		que la falsa gens que no-l cre
	55	lo dezerete ni-l malme,
		de lai on près mort e dolor.
		Chascus tanh de l’anar cossire,
		e-l princep, si cum son aussor,
		q’us non l’es fizels obezire
	60	si d’aquest afar no-l socor.
VII		Al Comte mon seinhor, vueilh dire
		qu’aissi cum ac primiers l’onor,
		gar que Dieus il sia grazire,
		qu’al passar comt’om la lauzor !